10th Exam : इंग्रजीच्या पेपरचा फोटो व्हायरल, आरोपी फरार..
दहावीचा इंग्रजीचा पेपर चक्क परीक्षा केंद्रातून मोबाइलवर फोटो काढून व्हायरल करण्याचा प्रकार भंडारा जिल्ह्यातील लाखांदूरजवळच्या एका परीक्षा केंद्रावर घडला. या प्रकरणातील आरोपी फरार असून केंद्रप्रमुख व पर्यवेक्षकावर गुन्हा दाखल करून पुढची कारवाई करण्यात येत आहे.
eduvarta@gmail.com 
एज्युवार्ता न्यूज नेटवर्क
बारावीच्या परीक्षेत घडलेल्या गैरप्रकाराच्या अनेक घटना ताजा असतानाच आता दहावीच्या परीक्षेत देखील गंभीर घटना (10th exam copying case) घडल्याचे समोर आले आहे. दहावीचा इंग्रजीचा पेपर (10th English paper) चक्क परीक्षा केंद्रातून मोबाइलवर फोटो काढून व्हायरल (English paper photo viral) करण्याचा प्रकार भंडारा जिल्ह्यातील लाखांदूरजवळच्या एका परीक्षा केंद्रावर घडला. सुदैवाने पेपर मोठ्या प्रमाणावर व्हायरल झाला नाही. या प्रकरणातील आरोपी फरार असून केंद्रप्रमुख व पर्यवेक्षकावर गुन्हा दाखल (Case registered against center head and supervisor) करून पुढची कारवाई करण्यात येत आहे.
भंडारा जिल्ह्यातील लाखांदूर तालुक्याच्या बारव्हा येथे हा धक्कादायक प्रकार समोर आला आहे. दहावी बोर्डाचा इंग्रजीचा पेपर शनिवारी होता. सकाळी ११ वाजता हा पेपर सुरू झाला. विभागीय मंडळाकडून मिळालेल्या माहितीनुसार, पेपर सुरू झाल्यानंतर ११:३० वाजताच्या सुमारास संबंधित केंद्रातील एक कर्मचारी पेपरचे फोटो काढताना आढळला. ही माहिती बोर्डाच्या अधिकाऱ्यांना मिळाली.
त्यानुसार त्या भागातील भरारी पथकाला माहिती देण्यात आली. त्यानुसार शिक्षणाधिकाऱ्यांवे भरारी पथक १० मिनिटांत बारव्हा येथील केंद्रावर पोहोचले. हा प्रकार खरा असल्याचे पथकाच्या लक्षात आले. यादरम्यान पेपरचा फोटो काढून व्हायरल करण्याचा प्रयत्न करणारा आरोपी कर्मचारी तोपर्यंत केंद्रावरून पसार झाला. याप्रकरणी संबंधित केंद्राचे केंद्रप्रमुख व पर्यवेक्षक यांच्यावर गुन्हा दाखल करण्यात आल्याची माहिती स्थानिक शिक्षण विभागाने दिली आहे.
तिघांविरुद्ध गुन्हा दाखल केल्याप्रकरणी लाखांदूरचे गटशिक्षणाधिकारी तत्त्वराज अंबादे यांनी दिघोरी (मोठी) येथील पोलिसांत तक्रार दाखल केली आहे. त्यावरून बारव्हा येथील महात्मा गांधी विद्यालयाचे मुख्याध्यापक विशाल फुले आणि सहायक शिक्षक दीपक दयाराम मेश्राम यांच्यासह मयूर टेंभरे नामक गोंदियातील एका मोबाइल धारकाविरुद्ध सायंकाळी उशिरा गुन्हा दाखल करण्यात आला आहे. या तिघांनी संगनमत करून सकाळी १०:४५ ते ११:३० दरम्यान प्रश्नपत्रिका व्हॉटसअॅपवरून व्हायरल केल्याचे तक्रारीत नमूद आहे.
