एमएचटी-सीईटी पीसीबीचा निकाल जाहीर; ११ विद्यार्थ्यांना १०० पर्सेंटाईल
या परीक्षेत राज्यातील ११ विद्यार्थ्यांनी १०० पर्सेंटाईल गुण मिळविले असून त्यामध्ये ८ विद्यार्थी आणि ३ विद्यार्थिनींचा समावेश आहे.सीईटी कक्षाच्या माहितीनुसार, यंदा १०० पर्सेंटाईल मिळविणाऱ्या विद्यार्थ्यांमध्ये राज्याबाहेरील एकाही विद्यार्थ्याचा समावेश नाही.
eduvarta@gmail.com 
एज्युवार्ता न्यूज नेटवर्क
महाराष्ट्र राज्य सामाईक प्रवेश परीक्षा (सीईटी) कक्षाने शैक्षणिक वर्ष २०२६-२७ साठी एप्रिल २०२६ मध्ये घेण्यात आलेल्या पीसीबी (फार्मसी व कृषी शिक्षण) गटाच्या पहिल्या संधीच्या एमएचटी-सीईटी परीक्षेचा निकाल जाहीर केला आहे. या परीक्षेत राज्यातील ११ विद्यार्थ्यांनी १०० पर्सेंटाईल गुण मिळविले असून त्यामध्ये ८ विद्यार्थी आणि ३ विद्यार्थिनींचा समावेश आहे.
यावर्षी १०० पर्सेंटाईल मिळविणाऱ्या विद्यार्थ्यांमध्ये नागपूरचे आदित्य अभिषेक सोमाणी, पालघरची झील हितेश छेडा, मुंबई शहरचे ॲशले कोस्टॅनसीओ फर्नांडिस, कोल्हापूरचे अथर्व उत्तम गडदे, सोलापूरची प्रतीक्षा दीपक गाढवे, धुळेचे अथर्व अविनाश काकुळडे, सांगलीचे सार्थक महेश पाटील, कोल्हापूरचे साहिम सादिक पटवेगर, पुण्याची राशी अमितकुमार चोप्रा, ठाण्याचे सौरीश सेन आणि पुण्याचे वरद अवधूत वैद्य यांचा समावेश आहे.सीईटी कक्षाच्या माहितीनुसार, यंदा १०० पर्सेंटाईल मिळविणाऱ्या विद्यार्थ्यांमध्ये राज्याबाहेरील एकाही विद्यार्थ्याचा समावेश नाही.
सीईटी कक्षाने प्रसिद्ध केलेल्या माहितीनुसार, पीसीबी गटाची परीक्षा २१ ते २६ एप्रिल २०२६ या कालावधीत सहा दिवसांत ११ सत्रांमध्ये संगणकाधारित (CBT) पद्धतीने घेण्यात आली. परीक्षेसाठी २ लाख ८४ हजार ६३ विद्यार्थ्यांनी नोंदणी केली होती. त्यापैकी २ लाख ६३ हजार २१३ विद्यार्थ्यांनी परीक्षा दिली. परीक्षेची एकूण उपस्थिती ९२.६६ टक्के होती.
परीक्षेला बसलेल्या विद्यार्थ्यांमध्ये १ लाख ३ हजार ३६० विद्यार्थी, १ लाख ५९ हजार ८४८ विद्यार्थिनी आणि ५ तृतीयपंथीयांचा समावेश होता. विशेष म्हणजे विद्यार्थ्यांपेक्षा विद्यार्थिनींची संख्या अधिक होती. परीक्षा राज्यातील ३६ जिल्ह्यांतील १८६ केंद्रांवर घेण्यात आली होती. यंदा महाराष्ट्राबाहेरील कोणत्याही केंद्रावर परीक्षा घेण्यात आली नव्हती.
दरम्यान, राष्ट्रीय स्तरावरील जेईई (मेन) परीक्षेप्रमाणे विद्यार्थ्यांना अधिक संधी उपलब्ध व्हावी यासाठी यंदापासून प्रथमच एमएचटी-सीईटी पीसीएम, पीसीबी तसेच एमबीए/एमएमएस अभ्यासक्रमांच्या प्रवेश परीक्षा दोन वेळा घेण्याचा निर्णय राज्य शासनाने घेतला आहे. दोनही परीक्षा दिलेल्या विद्यार्थ्यांचा जास्त पर्सेंटाईल असलेला निकाल प्रवेश प्रक्रियेसाठी ग्राह्य धरण्यात येणार आहे.
सीईटी कक्षाने विद्यार्थ्यांना निकाल पाहताना टक्केवारीऐवजी पर्सेंटाईलकडे लक्ष देण्याचे आवाहन केले आहे. पर्सेंटाईल हे इतर उमेदवारांच्या तुलनेतील विद्यार्थ्याचे स्थान दर्शवित असल्याने प्रवेश प्रक्रियेत त्यालाच महत्त्व दिले जाते.
-------------------------------------------------
वरदला 100 पर्सेंटईल मिळाले असून तो नीट परीक्षेची तयारी करत आहेत. वरडने फर्ग्युसन कॉलेजमधून इयत्ता बारावीची परीक्षा उत्तीर्ण केली असून त्याला 93 टक्के गुण आहेत, असे वरदची आई स्मिता वैद्य यांनी 'एज्युवार्ता'शी बोलताना सांगितले.
