TET चा पेपर कसा फुटला? प्रश्नपत्रिका बुटांच्या तळव्यांमध्ये लपवून प्रिंटिंग प्रेसमधून बाहेर आणली
आरोपी आग्रा येथील महिम पत्रण लिमिटेड या मुद्रणालयाचा माजी कर्मचारी असून, याच मुद्रणालयातून महाराष्ट्र TET-2026 परीक्षेचा प्रश्नपत्रिका संच लीक झाल्याचा आरोप आहे.मुद्रणालयातील कर्मचारी प्रश्नपत्रिका बुटांच्या तळव्यांमध्ये (इनसोलमध्ये) लपवून बाहेर आणत असल्याचे उघड झाले आहे.
Eduvarta
एज्युवार्ता न्यूज नेटवर्क
महाराष्ट्र शिक्षक पात्रता परीक्षा (TET-2026) पेपरफुटी प्रकरणातील फरार आरोपी सोनू कुमार दिवाकर (वय 35) याने सोमवारी भिवंडी न्यायालयात आत्मसमर्पण केले. दरम्यान, दिवाकर हा आग्रा येथील महिम पत्रण लिमिटेड या मुद्रणालयाचा माजी कर्मचारी असून, याच मुद्रणालयातून महाराष्ट्र TET-2026 परीक्षेचा प्रश्नपत्रिका संच लीक झाल्याचा आरोप आहे.मुद्रणालयातील कर्मचारी प्रश्नपत्रिका बुटांच्या तळव्यांमध्ये (इनसोलमध्ये) लपवून बाहेर आणत असल्याचे उघड झाले आहे.
मंगळवारी दिवाकरला न्यायालयात हजर करण्यात आले असता न्यायालयाने त्याला 2 ऑगस्टपर्यंत पोलीस कोठडी सुनावली. न्यायालयात हजार झाल्यानंतर विशेष तपास पथकाने (SIT) त्याला अटक केली.या अटकेनंतर या प्रकरणातील अटक आरोपींची संख्या 15 वर पोहोचली आहे.
पोलीसांनी दिलेल्या माहितीनुसार, नोकरी सोडल्यानंतरही दिवाकरने मुद्रणालयातील नरेशकुमार पुरणचंद महोरे (35), संजयकुमार सुरेशचंद्र चंद्रा (44) आणि बाबूलाल नारायणसिंह कुशवाहा (45) या कर्मचाऱ्यांशी संपर्क कायम ठेवला होता. हे कर्मचारी मुद्रणालयात छापल्या जाणाऱ्या परीक्षांच्या प्रश्नपत्रिकांची माहिती दिवाकरला पुरवत असत. त्यानंतर दिवाकर ही माहिती आणि प्रश्नपत्रिका कथित सूत्रधार बिजेंद्र गुप्ता व त्याच्या साथीदारांपर्यंत पोहोचवत असल्याचा आरोप आहे.
SIT मधील सहाय्यक पोलीस आयुक्त सचिन सांगळे यांनी सांगितले, आरोपीचा शोध घेण्यासाठी बिहारमध्ये सातत्याने छापेमारी सुरू होती. "14 आरोपींना आधीच अटक झाली होती आणि बिहारमध्ये त्याचा शोध सुरू असल्याने दिवाकरला अटक अटळ असल्याची जाणीव झाली. त्यामुळे त्याने भिवंडी न्यायालयात आत्मसमर्पण केले. त्यानंतर आम्ही त्याला औपचारिकरित्या अटक केली,"
तपास अधिकाऱ्यांच्या मते, दिवाकर हा या संपूर्ण रॅकेटमधील महत्त्वाचा दुवा होता. त्याने मुद्रणालयातून प्रश्नपत्रिका मिळवून त्या कथित सूत्रधार बिजेंद्र गुप्ताकडे पोहोचवल्या. हे प्रकरण 27 जून रोजी उघडकीस आले. परीक्षेच्या एक दिवस आधी ठाणे शहर पोलिसांनी भिवंडी येथे 1.5 कोटींच्या व्यवहारावर कारवाई करत TET-2026 च्या पेपर 1 आणि पेपर 2 च्या प्रती जप्त केल्या होत्या. त्यानंतर स्थापन करण्यात आलेल्या SIT च्या तपासात आग्रा येथील मुद्रणालयातून कार्यरत असलेले आंतरराज्यीय रॅकेट समोर आले.
गेल्या आठवड्यात या प्रकरणातील कथित सूत्रधार बिजेंद्र गुप्ता आणि त्याचा निकटवर्तीय इंद्रजीत सिंह यांना बिहारमधून अटक करण्यात आली होती. त्यानंतर दिवाकरच्या अटकेमुळे तपासाला आणखी महत्त्वाची दिशा मिळाली असून, या पेपरफुटी रॅकेटमागील संपूर्ण साखळी उघड करण्यासाठी SIT कडून पुढील तपास सुरू आहे.
