शाळांमध्ये बॉम्ब असल्याचा ई-मेल पाठवणारा विद्यार्थी पोलिसांच्या ताब्यात; सांगितले चक्रावणारे कारण
अल्पवयीन विद्यार्थ्याने तो शिकत असलेल्या शाळेला ६ वेळा धमकीचा मेल पाठवला होता. या व्यतिरिक्त एकाच वेळी २३ शाळांना एकच मेल पाठवला होता. कोणालाही संशय येऊ नये म्हणून, त्याने इतर शाळांनाही ईमेल सीसी केला होता.
eduvarta@gmail.com 
एज्युवार्ता न्यूज नेटवर्क
शाळेत बॉम्ब असल्याच्या ई-मेलने गेले कित्येक दिवस दिल्लीकरांना घाबरवून सोडले होते. आता हे खोटे मेल पाठवणारा आरोपी पोलिसांच्या ताब्यात सापडला आहे. हा आरोपी एक अल्पवयीन मुलगा असून इयत्ता 12 वीचा विद्यार्थी आहे. (Delhi schools bomb threat case police arrested 12th class student) असे मेल पाठवण्यामागे त्याने पोलिसांना अजब कारण सांगितले आहे.
मिळालेल्या माहितीनुसार, दिल्लीतील अनेक शाळांना बॉम्बच्या धमकीचे बनावट ई-मेल पाठवल्याप्रकरणी दिल्ली पोलिसांनी एका मुलाला अटक केली आहे. या प्रकरणात पोलिसांनी पकडलेला व्यक्ती बारावीचा विद्यार्थी आहे. अल्पवयीन विद्यार्थ्याने तो शिकत असलेल्या शाळेला ६ वेळा धमकीचा मेल पाठवला होता. या व्यतिरिक्त एकाच वेळी २३ शाळांना एकच मेल पाठवला होता. कोणालाही संशय येऊ नये म्हणून, त्याने इतर शाळांनाही ई-मेल सीसी केला होता. हे करण्यामागचे कारण विचारले असता, त्याने पोलिसांना सांगितलेले कारण चक्रावून टाकणारे होते. त्याला शाळेत होणार्या परीक्षेला बसायचे नव्हते म्हणून त्याने खोटा मेल पाठवल्याचे सांगितले आहे.
८ डिसेंबर २०२४ रोजी दिल्लीतील ४० हून अधिक शाळांना धमक्या मिळाल्या होत्या. रात्री ११:३८ च्या सुमारास धमकीचा ई-मेल आला होता. धमकीत असा दावा करण्यात आला होता की, कॅम्पसमध्ये बॉम्ब ठेवण्यात आले आहेत. जर बॉम्बचा स्फोट झाला तर मोठे नुकसान होईल. मेल पाठवणाऱ्याने स्फोट थांबवण्याच्या बदल्यात ३० हजार डॉलर्सची मागणी केली होती. यानंतर, १३ डिसेंबर रोजी पुन्हा एकदा दिल्लीतील १६ शाळा बॉम्बने उडवण्याची धमकी देणारा फोन आला होता.
