दिल्लीत खासगी वसतिगृह कोसळले; चार विद्यार्थ्यांचा मृत्यू, ४० जण ढिगाऱ्याखाली अडकले
दिल्लीतील सत्य निकेतन येथे वसतिगृह कोसळल्याने ४ विद्यार्थ्यांचा मृत्यू झाला असून ५ जण जखमी झाले आहेत. ढिगाऱ्याखाली अडकलेल्या विद्यार्थ्यांचा शोध बचाव पथकांकडून घेतला जात आहे.
Eduvarta
एज्युवार्ता न्यूज नेटवर्क
दिल्लीतील सत्य निकेतन परिसरात खासगी विद्यार्थी वसतिगृह असलेली पाच मजली इमारत सोमवारी दुपारी अचानक कोसळली. ‘हॉस्टेल डेज’ नावाच्या या इमारतीत मुलांसाठी वसतिगृह चालवले जात होते. दुपारी दीड वाजण्याच्या सुमारास इमारत ढासळली. या दुर्घटनेत चार विद्यार्थ्यांचा मृत्यू झाला असून पाच विद्यार्थी गंभीर जखमी झाले आहेत. बचाव पथकांनी आतापर्यंत आठ विद्यार्थ्यांना सुरक्षित बाहेर काढले आहे. मात्र मलब्याखाली आणखी ३० ते ४० विद्यार्थी अडकले असल्याचा अंदाज व्यक्त केला जात आहे. दिल्ली विद्यापीठाजवळील या भागात अनेक पेइंग गेस्ट आणि खासगी वसतिगृहे असल्याने घटनास्थळी मोठ्या प्रमाणात गोंधळ निर्माण झाला आहे.
इमारत ४० ते ५० वर्षे जुनी होती. गेल्या तीन दिवसांपासून तळमजल्यावर खोदकाम सुरू होते. यामुळे इमारतीचा पाया खचल्याची शक्यता वर्तवण्यात आली आहे. बहुतांश विद्यार्थी वसतिगृहातच उपस्थित होते तर काही विद्यार्थी आपल्या खोल्यांमध्ये झोपलेले असताना अचानक इमारत कोसळली. मलब्यात दबलेले विद्यार्थी आपल्या मित्रांना आणि नातेवाईकांना फोन करून मदतीची आर्त हाक देत असल्याची माहिती समोर आली आहे. जवळपासच्या वाहनांवरही मलबा पडला असून स्थानिक तरुण हातात हातोडे घेऊन काँक्रीटचा ढिगारा हटविण्यासाठी मदत करत आहेत.
अग्निशमन दल, पोलिस आणि इतर बचाव पथके घटनास्थळी दाखल झाली आहेत. मलबा बाजूला काढण्याचे काम जोरात सुरू आहे. श्वान पथकांचीही मदत घेण्यात येत आहे. वाचवलेल्या आठ विद्यार्थ्यांपैकी पाच जखमींना एम्स रुग्णालयात दाखल करण्यात आले आहे. त्यापैकी काहींची प्रकृती चिंताजनक असल्याचे सांगण्यात आले. एका विद्यार्थ्याला रुग्णालयात मृत जाहीर करण्यात आले असून त्याची ओळख अद्याप पटलेली नाही. वसतिगृहाच्या नोंदी तपासून अचूक संख्या निश्चित करण्याचे प्रयत्न सुरू आहेत.
दुर्घटनेनंतर प्रशासनाने बचाव मोहीम तीव्र केली आहे. मलब्यात अडकलेल्या विद्यार्थ्यांना शक्य तितक्या लवकर बाहेर काढण्यासाठी सर्व यंत्रणा एकवटली आहेत. स्थानिक रहिवासी आणि विद्यार्थ्यांचे नातेवाईक घटनास्थळी जमले असून त्यांना शांत राहण्याचे आवाहन करण्यात येत आहे. इमारतीची जुनी रचना आणि सुरू असलेले खोदकाम या दुर्घटनेचे मुख्य कारण असल्याचे प्राथमिक अंदाज आहे. अधिकृत चौकशी सुरू झाली असून बचाव कार्याचे अद्ययावत अहवाल नियमितपणे जाहीर केले जाणार आहेत.
