कोल्हापूरातील नामांकित केआयटी महाविद्यालयातील प्राध्यापकाकडून विद्यार्थिनीचा विनयभंग
पीडित विद्यार्थिनी ही मूळची पंढरपूर येथील रहिवासी असून कोल्हापुरात उच्च शिक्षण घेत आहे. ती 'सिव्हिल एन्व्हायरमेंट' विभागाच्या दुसऱ्या वर्षात शिक्षण घेत असून, आरोपी सौरभ जोशी याच विभागात वरिष्ठ पदावर कार्यरत आहे.
eduvarta@gmail.com 
एज्युवार्ता न्यूज नेटवर्क
कोल्हापूर जिल्ह्यातून अत्यंत संतापजनक (Kolhapur Crime News) आणि धक्कादायक प्रकार समोर आला आहे. शहरातील नामांकित के. आय.टी. इंजिनिअरिंग कॉलेजमधील (K. I. T. Engineering College) प्राध्यापकाने एका विद्यार्थिनींशी अश्लील (Student molested by professor) वर्तन केल्याचे उघडकीस आले आहे. याप्रकरणी गोकुळ शिरगाव पोलीस ठाण्यात संबंधित प्राध्यपकाच्याविरुद्ध विनयभंगाचा गुन्हा (Crime of molestation) दाखल करण्यात आला आहे. पीडित विद्यार्थिनीच्या धैर्यामुळे संबंधित नराधम प्राध्यापकाचे काळे कृत्य चव्हाट्यावर आले आहे.
मिळालेल्या प्राथमिक माहितीनुसार, सौरभ जोशी नावाचा प्राध्यापक वर्गामध्ये शिकवत असताना विशिष्ट विद्यार्थिनींना विनाकारण लक्ष करायचा. विषयातील शंकांचे निरसन करण्याच्या किंवा अभ्यासाच्या निमित्ताने तो विद्यार्थिनींना आपल्या खाजगी केबिनमध्ये बोलावून घेत होता. केबिनमध्ये कोणीही नसल्याची संधी साधून तो विद्यार्थिनींशी जवळीक साधण्याचा आणि त्यांच्याशी अश्लील चाळे करण्याचा प्रयत्न करत असल्याची तक्रार पीडितेने दिली आहे. विशेष म्हणजे, आरोपीने केवळ एकाच नव्हे, तर इतरही ४ ते ५ विद्यार्थिनींशी अशाच प्रकारचे लज्जास्पद वर्तन केल्याचे आता समोर येत आहे.
पीडित विद्यार्थिनी ही मूळची पंढरपूर येथील रहिवासी असून कोल्हापुरात उच्च शिक्षण घेत आहे. ती 'सिव्हिल एन्व्हायरमेंट' विभागाच्या दुसऱ्या वर्षात शिक्षण घेत असून, आरोपी सौरभ जोशी याच विभागात वरिष्ठ पदावर कार्यरत आहे. केमिस्ट्रीच्या तासाला जोशीने पीडितेला काही प्रश्न विचारले, ज्यांची उत्तरे तिला देता आली नाहीत. याच गोष्टीचा आधार घेत त्याने तिला समजावण्याच्या बहाण्याने केबिनमध्ये बोलावले. तिथे त्याने तिला इतर मुलांशी मैत्री न करण्याच्या सूचना दिल्या आणि "मला तुझा जवळचा मित्र समज" असे म्हणत अश्लील चाळे केले. तसेच तिला सतत फोन करण्यासाठी तो मानसिक दबाव टाकत होता, असेही तक्रारीत नमूद आहे.
आरोपी एवढ्यावरच न थांबता त्याने तिला केबिनमध्ये बोलावून मिठी मारण्याचा प्रयत्न केला. या प्रकारामुळे संतप्त झालेल्या विद्यार्थिनीने त्याला कडक शब्दांत सुनावले आणि तिथून निघून गेली. मात्र, या घटनेनंतर प्राध्यापकाचा त्रास अधिकच वाढला. जेव्हा तिने केबिनमध्ये जाण्यास नकार दिला, तेव्हा त्याने तिला वर्गात अपमानित करण्यास सुरुवात केली. हा छळ असह्य झाल्यामुळे अखेर पीडितेने गोकुळ शिरगाव पोलीस ठाणे गाठून आपल्यावर झालेल्या अन्यायाची आपबिती सांगितली. पोलिसांनी पीडित विद्यार्थिनीच्या तक्रारीची गंभीर दखल घेत प्राध्यापक सौरभ जोशी याच्याविरुद्ध विनयभंग आणि अन्य कलमान्वये गुन्हा दाखल केला आहे.
