CUET UG 2026 साठी प्रक्रिया नोंदणी सुरू; असा करा अर्ज

एज्युवार्ता न्यूज नेटवर्क 

नॅशनल टेस्टिंग एजन्सीने (NTA) कॉमन युनिव्हर्सिटी एन्ट्रन्स टेस्ट (CUET UG 2026) साठी ऑनलाइन नोंदणी प्रक्रिया (Online registration process) सुरू केली आहे. पदवीपूर्व अभ्यासक्रमांना प्रवेश घेऊ इच्छिणारे उमेदवार आता NTA च्या अधिकृत वेबसाइट https://cuet.nta.nic.in/ ला भेट देऊन CUET UG 2026 साठी नोंदणी करू शकतात. इच्छुक आणि पात्र उमेदवार 30 जानेवारी 2026 पर्यंत ऑनलाइन अर्ज नोंदणी (The deadline for application registration is January 30th) करू शकतात. शुल्क भरण्याची शेवटची तारीख 31 जानेवारी 2026 आहे. उमेदवारांना 2 फेब्रुवारी ते 4 फेब्रुवारी दरम्यान त्यांच्या फॉर्ममध्ये सुधारणा करण्याची संधी देखील दिली जाईल.

हेही वाचा - मुक्त विद्यापीठाच्या वार्षिक सत्र लेखी परीक्षा उद्यापासून सुरू

CUET UG 2026 साठी अर्ज करण्यासाठी, सर्व श्रेणीतील उमेदवारांना नोंदणी शुल्क भरावे लागेल. सामान्य श्रेणीतील उमेदवारांना तीन विषयांसाठी १००० रुपये आणि अतिरिक्त विषयासाठी ४०० रुपये, आर्थिकदृष्ट्या कमकुवत आणि इतर मागासवर्गीय उमेदवारांना तीन विषयांसाठी ९०० रुपये आणि अतिरिक्त विषयासाठी ३७५ रुपये नोंदणी शुल्क आहे. तर अनुसूचित जाती, जमाती आणि अपंग उमेदवारांना तीन विषयांसाठी ८०० रुपये आणि अतिरिक्त विषयासाठी ३५० रुपये जमा करावे लागतील.

अशी  करा ऑनलाइन नोंदणी 

ऑनलाइन नोंदणी करण्यासाठी उमेदवाराने प्रथम अधिकृत वेबसाइट cuet.nta.nic.in ला भेट द्यावी. त्यानंतर वेबसाइटच्या होमपेजवरील CUET UG 2026 नोंदणी लिंकवर क्लिक करावे. तिथे विचारण्यात आलेली आवश्यक माहिती काळजीपूर्वक भरा. मागितलेल्या कागदपत्रांच्या स्कॅन केलेल्या प्रती अपलोड करा. सर्व कागदपत्रे सादर केल्यानंतर, नोंदणी शुल्क भरा. शेवटी, भविष्यातील संदर्भासाठी त्याची प्रिंटआउट घ्या.

NTA ने जारी केलेल्या अधिसूचनेनुसार, CUET UG 2026 परीक्षा 11 ते 31 मे 2026 दरम्यान घेतली जाईल. ही परीक्षा उत्तीर्ण होणारे उमेदवार देशभरातील प्रतिष्ठित विद्यापीठांमध्ये पदवीपूर्व अभ्यासक्रमांमध्ये प्रवेश घेऊ शकतील.