तीन परीक्षा एकाच वेळी आल्याने विद्यार्थी संभ्रमात

एज्युवार्ता  न्यूज नेटवर्क

विद्यार्थ्यांना गोंधळात टाकणारी बातमी समोर आली आहे. मे महिन्याच्या शेवटच्या आठवड्यात  लोकसेवा आयोगाच्या परीक्षा (Public Service Commission Exams) पूर्वनियोजित आहेत. याच कालावधीत विद्यापीठांच्या (University Examinations) आणि त्याचबरोबर शिक्षक भरतीसाठी होणारी शिक्षक अभियोग्यता व बुद्धिमत्ता चाचणी (Teacher Aptitude and Intelligence Test) ही परीक्षा पार पडत आहे. टेट परीक्षा २४ मे ते ५ जून या कालावधीत होत आहे. विद्यापीठ, टेट आणि राज्यसेवा या तिन्ही  परीक्षा या महिन्याच्या अखेरीस आल्याने नेमकी कोणती परीक्षा द्यायची? असा संभ्रम विद्यार्थ्यांमध्ये निर्माण झाला आहे.

महाराष्ट्र लोकसेवा आयोगाची राज्यसेवा मुख्य परीक्षा २७ मे ते २९ मे या कालावधीत आहे. केंद्रीय लोकसेवा आयोगाची नागरी पूर्व परीक्षाही या महिन्याच्या शेवटच्या आठवड्यात आहे. त्यात महाराष्ट्र राज्य परीक्षा परिषदेने टेट परीक्षा याच कालावधीत आयोजित केली आहे. अनेक विद्यार्थी शिक्षक भरतीसाठी देखील इच्छुक असतात. त्यामुळे टेट परीक्षा पुढे ढकलावी, अशी मागणी सध्या केली जात आहे.  

प्रवेशपत्र कसे अपलोड करणार

दरम्यान, राज्य परीक्षा परिषदेने टेट परीक्षेचा अर्ज भरताना त्यात उमेदवार अन्य स्पर्धा परीक्षा देत असेल तर त्याचे प्रवेशपत्र अपलोड करण्यात यावे, असे सांगितले आहे. त्यासाठी १४ मे पर्यंतची उमेदवारांना मुदतवाढ दिली आहे. परंतु, स्पर्धा परीक्षेचे प्रवेशपत्र परीक्षेच्या अगोदर सात दिवस उपलब्ध होते. असे असताना हे उमेदवार संबंधित परीक्षेचे प्रवेशपत्र कसे अपलोड करणार? असा प्रश्न देखील उमेदवारांकडून उपस्थित होत आहे.