सेंट हेलेना स्कूलचा प्रताप: तिसरी- आठवीच्या 60 विद्यार्थ्यांचे दाखले दिले हातात; RTE चे उल्लंघन ?

एज्युवार्ता न्यूज नेटवर्क 

विद्यार्थी अभ्यासात कमकुवत असल्याचे कारण पुढे करून पुण्यातील सेंट हेलेना स्कूलने (St. Helena School) तिसरी ते आठवीपर्यंतच्या सुमारे 60 विद्यार्थीनींचे दाखले त्यांच्या पालकांच्या हातात (Students' tc in the hands of their parents)दिल्याची धक्कादायक माहिती समोर आली आहे. त्यामुळे विविध विद्यार्थी आणि राजकीय संघटनांनी आक्रमक भूमिका घेतली आहे. विद्यार्थीनींचे यामुळे शैक्षणिक नुकसान झाले असून शाळेने शिक्षण हक्क कायद्याचे उल्लंघन (Violation of Right to Education Act)केले असल्याचा आरोप पालकांनी व संघटनेच्या कार्यकर्त्यांनी केला आहे. तसेच या प्रकरणी शाळेवर कारवाई करावी,अशी मागणी पुणे महापालिकेच्या शिक्षण विभागाकडे (Education Department of Pune Municipal Corporation)निवेदनाद्वारे केली आहे.दरम्यान, शाळा प्रशासनाशी याबाबत संपर्क करण्याचा प्रयत्न केला असता संपर्क होऊ शकला नाही.

 सेंट हेलेना स्कूलने त्यांच्याच शाळेत मागील वर्षी शिकत असलेल्या अप्रगत विद्यार्थीनींना पुढील वर्गात प्रमोट असे गुणपत्राक देवून त्यांचा प्रवेश रद्द केला आहे.तसेच विद्यार्थी आणि पालकांना जबरदस्तीने शाळा सोडल्याचे दाखले घेणे भाग पाडले आहे. प्रवेश रद्द झालेल्या अनेक विद्यार्थिनी, आणि त्यांचे पालक हतबल झाले असून, सेंट हेलेना स्कूलने विद्यार्थिनींना शिक्षणाच्या हक्कापासून वंचित ठेवल्याने शाळेवर कारवाई करावी,अशी मागणी पुणे मनपाच्या प्राथमिक शिक्षण विभागाच्या प्रशासन अधिकारी सुनंदा वाखारे यांच्याकडे विविध संघटनांच्या शिष्टमंडळाने केली. विद्यार्थी विकास मंचचे अध्यक्ष सुरेश खुरपे, अनिल शेवरे, मयूर गुरव, काँग्रेस लीगल सेलचे फैयाज शेख, भाजपाचे अतुल साळवी, आदमी पक्षाचे अमोल काळे, रिपब्लिकन विद्यार्थी सेनेचे विवेक बनसोडे आदींचा या शिष्टमंडळात समावेश होता.

सेंट हेलेना स्कूलने शिक्षण हक्क कायद्याचा भंग करताना विद्यार्थिनींना जाणून  बुजून नापास करून त्यांचे प्रवेश रद्द केले आहेत. चालू शैक्षणिक वर्षात सी.बी.एस.सी.आणि आय.सी एस.सी. बोर्डाच्या अनेक शाळांनी त्यांच्यात शाळेत पूर्वी शिकत असलेल्या असलेल्या अनेक विद्यार्थ्यांना नापास करून शिक्षण हक्क कायद्याचा भंग केल्या असल्याच्या तक्रारी आल्या आहेत, असा आरोप सुरेश खुरपे यांनी केला आहे.

विवेक बनसोडे म्हणाले, या विषयाच्या अनुषंगाने राजकीय पक्ष आणि विद्यार्थी संघटनांनी सेंट हेलेना स्कूलच्या प्रशासनाशी भेट घेतली असता प्रशासनाने योग्य दखल घेतली नाही. तसेच स्कूलच्या प्रिन्सिपलला भेटू न देता कोर्टात जाण्याची भाषा केली.तसेच शिक्षण हक्क कायदा आम्हाला लागू नाही,असे सांगून पोलिसात जाण्याची धमकी दिली.  

-----------------------

- सेंट हेलेना स्कूलबाबत विविध संघटनांकडून निवेदन प्राप्त झाले आहे. पालक व संघटनेच्या तक्रारीनुसार या प्रकरणाची चौकशी करून योग्य कारवाई केली जाईल. 
सुनंदा वाखारे,  प्रशासकीय अधिकारी, पुणे महापालिका प्राथमिक शिक्षण विभाग