माळेगावमध्ये प्राचार्य जाधवर पोलिसांच्या जाळ्यात; एसीबीची मोठी कारवाई

एज्युवार्ता न्यूज नेटवर्क

खासगी शैक्षणिक संस्थेत परीक्षेसाठी पर्यवेक्षक नियुक्तीसाठी बारामती तालुक्यातील माळेगाव (Malegaon in Baramati taluka)येथील अनंतराव पवार शासकीय औद्योगिक प्रशिक्षण संस्थेच्या प्राचार्य (Anantrao Pawar, Principal of Government Industrial Training Institute)पदाचा अतिरिक्त कार्यभार असलेल्या अवधूत जाधवर (Avadhoot Jadhav)यांना लाच घेतल्या प्रकारणी रांगेहाथ पकडण्यात आले. माळेगाव साखर कारखान्याच्या निवडणूकीचा निकाल जाहीर होत असताना पोलिसांनी केलेली ही कारवाई चर्चेचा विषय बनली आहे.

याबाबत पोलिसांनी दिलेल्या माहितीनुसार तक्रारदार हे खाजगी पॅरामेडिकल इन्स्टिट्यूटचे अध्यक्ष असून त्यांच्या इन्स्टिट्यूटकडून घेण्यात येणा-या चालू वर्षाच्या परीक्षेकरिता ४५ विद्यार्थी बसले आहेत. या परिक्षेकरीता माळेगाव येथील शासकीय औद्योगिक शिक्षण संस्था यांच्याकडून त्यांच्या नेमणुकीतील परीक्षा पर्यवेक्षक नेमले जातात. अवधूत जाधवर हे अनंतराव पवार शासकीय औद्योगिक प्रशिक्षण संस्था माळेगाव येथे उपप्रचार्य या पदावर कार्यरत असून सध्या त्यांच्याकडे प्राचार्य या पदाचा सुद्धा अतिरिक्त कार्यभार आहे.

तक्रारदार यांनी अनंतराव पवार शासकीय औद्योगिक प्रशिक्षण संस्थेस पत्र देऊन त्यांच्या पॅरामेडिकल संस्थेच्या परीक्षेकरिता पर्यवेक्षक नेमण्याची मागणी केली. त्याप्रमाणे प्राचार्य पदाचा अतिरिक्त कार्यभार असलेले अवधूत जाधवर यांनी तक्रारदाराकडे त्यांच्या संस्थेची चालू वर्षातील परीक्षेसाठी पर्यवेक्षक नेमण्यासाठी आणि ती परीक्षा सुरळीत पार पाडून देण्यासाठी तक्रारदाराच्या संस्थेच्या परीक्षेत बसणा-या एका विद्यार्थ्यासाठी २ हजार असे ४५ विद्यार्थ्यांसाठी एकूण ९० हजार रुपयांच्या लाचेची मागणी केली. त्या रक्कमेपैकी १० हजार रुपये तक्रारदाराकडून अगोदरच घेतले गेले होते. त्यानंतर जाधवर यानी पर्यवेक्षक नेमण्याचे पत्र तक्रारदारास दिले. त्या पत्राप्रमाणे पर्यवेक्षक येऊन तक्रारदाराच्या संस्थेतील परीक्षा सुरू झाली. त्यानंतर परीक्षा सुरू असताना अवधूत जाधवर यांनी उर्वरित ८० हजार रुपयांच्या लाच रकमेसाठी तक्रारदाराच्या पाठीमागे तगादा लावत असल्याची तक्रार तक्रारदाराने २३ जून २०२५ रोजी लाच लुचपत प्रतिबंधक विभागाकडे केली.

प्राप्त तक्रारीच्या नुसार २३ जून २०२५ रोजी पंचासमक्ष पडताळणी केली असता अवधूत जाधवर, उपप्राचार्य (अति. कार्यभार प्राचार्य) यांनी तक्रारदाराकडे त्यांच्या पॅरामेडिकल संस्थेमध्ये घेण्यात येणा-या परीक्षेकरिता पर्यवेक्षक नेमण्याच्या बदल्यात तसेच परीक्षा सुरळीत पार पाडण्यासाठी तसेच परीक्षेदरम्यान काहीही अडचण न आणण्याकरिता तक्रारदार यांच्याकडे सुरवातीस ८० हजार रुपयांची लाच मागणी करून तडजोडीअंती ४० हजार रुपयाची लाच मागितल्याचे निष्पन्न झाले.

लुचपत प्रतिबंधक विभागाने २४ जून ६ रोजी सापळा रचून अनंतराव पवार शासकीयऔद्योगिक प्रशिक्षण संस्थेचे उप प्राचार्य जाधवर यांना 'हॉटेल सिटी इन' बारामती येथे तक्रारदाराकडून ४० हजार रुपयाची लाच स्वीकारताना रंगेहाथ पकडले. अवधूत जाधवर यांचेविरुद्ध भ्रष्टाचार प्रतिबंध अधिनियमानुसार गुन्हा नोंद करण्याची प्रक्रिया सुरु आहे,अशी माहिती पोलिसांनी कळवली आहे.