गुरुपौर्णिमेनिमित्त एम. ई. एस. इंग्लिश मीडियम स्कूल, शिरवळ येथे पितृपूजन उपक्रम

एज्युवार्ता न्यूज नेटवर्क

गुरुपौर्णिमेनिमित्त एम. ई. एस. इंग्लिश मीडियम स्कूल, शिरवळच्या प्राथमिक विभागात विद्यार्थ्यांमध्ये पालकांविषयी आदर, कृतज्ञता आणि संस्कारांची जाणीव दृढ करण्याच्या उद्देशाने ‘पितृपूजन’ या आगळ्यावेगळ्या उपक्रमाचे आयोजन करण्यात आले. ‘आई-वडील हेच आपल्या जीवनातील पहिले गुरु’ या संकल्पनेवर आधारित या कार्यक्रमाला इयत्ता पहिली ते चौथीतील सुमारे ५० वडील पालकांनी उत्स्फूर्त प्रतिसाद दिला.

कार्यक्रमाच्या प्रारंभी मुख्याध्यापिका स्वाती जोशी यांनी गुरुपौर्णिमेचे महत्त्व विशद करत पालक हे मुलांचे पहिले गुरु असल्याचे सांगितले. व्यस्त दिनचर्येतून वेळ काढून उपस्थित राहिलेल्या सर्व वडील पालकांचे त्यांनी आभार मानले. विद्यार्थ्यांनी पालकांचा आदर करावा, त्यांच्या त्यागाची जाणीव ठेवावी आणि त्यांच्या मार्गदर्शनाचा सन्मान करावा, असा संदेश त्यांनी दिला.

यानंतर इयत्ता तिसरी व चौथीतील प्रतिनिधी विद्यार्थ्यांनी आपल्या वडिलांविषयीच्या भावना मनोगतातून व्यक्त केल्या. त्यांच्या हृदयस्पर्शी शब्दांनी उपस्थित पालक आणि शिक्षक भावूक झाले.

कार्यक्रमातील प्रमुख आकर्षण ठरलेल्या पितृपूजन सोहळ्यात विद्यार्थ्यांनी आपल्या वडिलांचे पूजन करून त्यांना नम्रतापूर्वक वंदन केले, आशीर्वाद घेतले आणि स्वतः तयार केलेले शुभेच्छापत्र भेट दिले. या प्रसंगी विद्यालयात प्रेम, आदर, कृतज्ञता आणि संस्कारांचे भावपूर्ण वातावरण अनुभवायला मिळाले.

विद्यार्थी आणि पालक यांच्यातील भावनिक नाते अधिक दृढ करण्याबरोबरच भारतीय संस्कृतीतील मातृ-पितृ पूजनाच्या परंपरेचे महत्त्व विद्यार्थ्यांच्या मनावर बिंबविण्यात हा उपक्रम यशस्वी ठरला. उपस्थित पालकांनी या अभिनव उपक्रमाचे मनापासून कौतुक करत तो संस्मरणीय ठरल्याची भावना व्यक्त केली.