विद्यार्थ्यांचा शालेय गणवेश शिवणारा असा टेलर पुन्हा होणे नाही..

एज्युवार्ता न्यूज नेटवर्क 

राज्यातील शाळांमध्ये विद्यार्थ्यांना वाटप करण्यात आलेल्या गणवेशाचे (School uniform) फोटो सध्या सोशल मीडियावर व्हायरल होत आहेत. त्यातून शिक्षण विभागाचा (Department of School Education) भोंगळ कारभार चव्हाट्यावर आला आहे. विद्यार्थ्यांना देण्यात आलेल्या गणवेशाचे कापड हलक्या दर्जाचे असून ते अंदाजे शिवल्यामुळे ताळमेळ लागत नसल्याचे चित्र दिसून येत आहे. कोणाला लहान तर कोणाला मोठे, बाजू खालीवर, कुठे फाटलेले तर कुठे शिलाई उसवलेले अशा एक ना अनेक समस्या (Many problems) पुढे येताना दिसत आहेत. त्यामुळे सरकारची सर्व भिस्त ही कंत्राटदारावर असून पालक मात्र समस्यांनी त्रस्त असल्याचे दिसून येत आहेत. त्यामुळे त्यांच्याकडून तीव्र नाराजी व्यक्त केली जात आहे. 

शाळा सुरू होऊन तब्बल तीन महिन्यांनंतर शिक्षण विभागाकडून राज्यातील जिल्हा परिषदेसह अन्य स्थानिक स्वराज्य संस्थेच्या शाळेत शिक्षण घेत असलेल्या इयत्ता पहिली ते आठवीच्या विद्यार्थ्यांना मोफत शालेय गणवेश वाटप करण्यात येत आहेत. मात्र, यामुळे येणार्‍या अनेक समस्यांना शिक्षकांसह, मुख्याध्यापकांना समोरे जावे लागत आहे. या प्रकारामुळे शिक्षकही कंटाळले आहेत.

शिक्षण सरकारचा मोठा निर्णय! आता प्रत्येक शाळेत प्रशिक्षणार्थी शिक्षकाची नियुक्ती होणार..

यापूर्वी शाळेच्या पट संख्येप्रमाणे प्रत्येकी दोन गणवेशांचे प्रत्येकी ३०० रुपयांप्रमाणे जी रक्कम होईल, ती रक्कम शाळा व्यवस्थापन समितीच्या खात्यावर जमा केली जात होती. ती जमा झाल्यानंतर शाळा व्यवस्थापन समिती व मुख्याध्यापक कापडाची गुणवत्ता पाहून ते खरेदी करत प्रत्येक विद्यार्थ्यांचे माप घेऊन त्या मापात कपडे शिऊन घेत. त्यामुळे स्वातंत्र्यदिनापूर्वी विद्याथ्यांना शालेय गणवेशाचे वाटप होत होते.  मात्र, चालू वर्षी शिक्षण मंत्रालयाने संपूर्ण बदलाचे धोरण स्वीकारून गणवेशाचे हे काम एका खाजगी कंपनीला दिले. त्यामुळे अनेक समस्या उद्भवत असल्याचे सांगण्यात येत आहे. 

विद्यार्थिनींना दिलेले शर्ट आणि स्कर्ट एकत्र जोडले आहेत. त्यामुळे व्यवस्थित होत नाहीत. गळ्यामध्ये व्यवस्थित नाहीत, मुलांच्या गणेवशाचे मोजमाप कमी आहे. कलर एक अन् शर्टच्या बाह्या दुसऱ्याच रंगाच्या असल्याचे शालेय गणवेशात दिसून येत आहे. या सगळ्या प्रकारात शालेय गणवेश कुणाला बसतात, तर बऱ्याच विद्यार्थ्यांना ते छोटे किंवा मोठे होतात, अशी परिस्थिती आहे. त्यामुळे शालेय गणवेशात सावळा गोंधळ निर्माण झाला असून, पालकांमध्ये नाराजी पसरली आहे. तर शिक्षकांची मात्र पालकांना उत्तरे देताना नाहक डोकेदुखी वाढली आहे.