SPPU : विद्यापीठ उपकेंद्राच्या नावावरून नवा वाद, भाऊसाहेब हिरे यांच्या नावाला विरोध 

एज्युवार्ता न्यूज नेटवर्क 

सावित्रीबाई फुले पुणे विद्यापीठाच्या (Savitribai Phule Pune University) अहिल्यानगर उपकेंद्राला पद्मश्री विठ्ठलराव विखे पाटील यांचे नाव तर नाशिक उपकेंद्राला (University Sub-Center) कर्मवीर भाऊसाहेब हिरे (Bhausaheb Hire) यांचे नाव देण्याचा ठराव नुकताच अधिसभेत मंजूर करण्यात आला. मात्र, याच नावावरून नवा वाद पेटण्याची शक्यता वर्तवण्यात येत आहे. विद्यापीठाच्या नाशिक उपकेंद्राला कर्मवीर हिरे यांचे नाव देण्याच्या प्रस्तावाला युवासेना (शिंदे गट) कार्यकर्त्यांनी कडाडून विरोध दर्शवित उपकेंद्राच्या इमारतीसमोर निदर्शने केली. तसेच नाशिक उपकेंद्राला स्वातंत्र्यवीर सावरकर यांचे नाव देण्याची मागणी केली आहे.त्यामुळे नव्या वादाला तोंड फुटण्याची शक्यता आहे. 

नाशिक जिल्ह्यातील हिरे घराणे स्वातंत्र्यपुर्व कालावधीपासून देशाच्या राजकीय पटलावर कार्यरत आहे. हिरे घराण्यातील कर्मवीर भाऊसाहेब हिरे यांचे अनेकविध क्षेत्रातील कार्य आहे. हाच धागा पकडून नाशिक उपकेंद्राला हिरे यांचे नाव देण्याचा ठराव अधिसभेत मांडण्यात आला. मात्र, त्यांच्या नावाला काही राजकीय पक्षाकडून कडाडून विरोध केला जात आहे. त्यामुळे पुणे विद्यापीठ उपकेंद्राच्या नाशिक नावावरून नवा वाद पेटण्याची शक्यता आहे. त्यात विद्यापीठाने सुध्दा याबाबत खुलासा करणारे प्रसिद्धीपत्रक प्रसिध्द केले आहे. 

विद्यापीठाने प्रसिध्द केलेल्या पत्रकानुसार सावित्रीबाई फुले पुणे विद्यापीठाच्या नाशिक व अहिल्यानगर उपपरिसराला नाव देण्याच्या अनुषंगाने विद्यापीठाच्या नुकत्याच झालेल्या अधिसभेत प्रस्ताव मांडण्यात आले होते. त्याअनुषंगाने माध्यमांमध्ये व वृत्तपत्रांमध्ये बातम्या छापून आल्या आहेत. याबाबत विद्यापीठातर्फे कळविण्यात येते की, सदर विषयांच्या अनुषंगाने अधिसभेत प्रस्ताव मंजूर झाले असले तरी देखील संबंधित अधिकार मंडळाकडे अधिसभेचे ठराव विचारार्थ पाठविण्यात येऊन विहित प्रक्रिया पूर्ण झाल्यावर सदरबाबत अंतिम निर्णय घेण्यात येईल. त्यानंतर विद्यापीठ याबाबत अंमलबजावणी करेल, याची संबंधितानी कृपया नोंद घ्यावी.
__________________________________

“सावित्रीबाई फुले पुणे विद्यापीठाच्या नाशिक उपकेंद्राला कर्मवीर हिरेंचे नाव” ही अर्धसत्य सांगणारी माहिती आहे. असा कुठलाही निर्णय विद्यापीठाने घेतलेला नाही. सिनेट बैठकीत हिरेंच्या संस्थेतील सदस्याने असा प्रस्ताव ठेवला होता. याला विद्यापीठ विकास मंचच्या सदस्य विनायक अंबेकर, शंतनू लामधडे, अद्वैत बंबोली, कृष्णा भांडलकर, राहुल पाखरे आदींनी जोरदार विरोध केला. एकमत होत नसल्याने वाद टाळण्यासाठी या विषयावर समिती गठीत करावी. सदर समिती अधिकार मंडळ, मॅनेजमेंट काउन्सिल पुढे यासंबंधीचा अहवाल ठेवावा,अशी चर्चा झाली. असा सादर प्रस्ताव झाला इतकेच.. यात कुठेही कॅम्पसला कर्मवीर हिरेंचे नाव देण्याचा अंतिम निर्णय झालेला नाही. 
- सागर वैद्य, ⁠मॅनेजमेंट काउन्सिल मेंबर, सावित्रीबाई फुले पुणे विद्यापीठ

--------------------------------

सावित्रीबाई फुले पुणे विद्यापीठामार्फत मागील एक वर्षापासून उपकेंद्राचे काम पूर्ण झालेले असताना फक्त श्रेय वादामुळे अनेक कुलगुरूंनी हे उद्घाटन रखडवले आहे. तरी त्याचं लवकरात लवकर उद्घाटन करून त्या उपकेंद्राला नाशिकचे भूमिपुत्र स्वातंत्र्यवीर विनायक दामलोर सावरकर हे नाव द्यावे.

- आदित्य बोरस्ते, जिल्हा चिटणीस (युवासेना) नाशिक 
__________________________________

नाशिकमध्ये सुरू होणाऱ्या सावित्रीबाई फुले पुणे विद्यापीठाच्या उपकेंद्राला 'स्वातंत्र्यवीर सावरकर नाशिक उपकेंद्र' असे नाव देणे ही केवळ एक बाब नव्हे, तर सावरकरांच्या विचारांना अभिवादन करण्याचा सर्वोत्तम मार्ग ठरेल. 

-प्रशांत जाधव, नाशिक महानगर अध्यक्ष (भाजपा)