NEET UG च्या शिल्लक जागांसाठी विशेष प्रवेश फेरी ; सर्वोच्च न्यायालयाचा आदेश

एज्युवार्ता न्यूज नेटवर्क 

समुपदेशनाच्या पाच फेऱ्यांनंतरही रिक्त राहिलेल्या वैद्यकीय जागांची संख्या लक्षात घेऊन सर्वोच्च न्यायालयाने (Supreme Court) वैद्यकीय समुपदेशन समितीला (Medical counseling  Committee) विशेष सूचना दिली आहे. या सूचनेनुसार या शिल्लक राहिलेल्या जागांसाठी न्यायालयाने विशेष उपाय म्हणून NEET UG प्रवेशाची मुदत 30 डिसेंबरपर्यंत वाढवली आहे. (NEET UG admission deadline extends till decembre 30) रिक्त जागा भरण्यासाठी अधिकाऱ्यांना नव्याने समुपदेशन करण्याचे निर्देश देण्यात आले आहेत.

समुपदेशनाच्या पाच फेऱ्या झाल्यानंतरही उर्वरित रिक्त जागांसाठी विशेष समुपदेशन फेरी घेण्याची याचिका न्यायालयात सादर करण्यात आली होती. त्यावर सुनावणी करताना न्यायमूर्ती बीआर गवई आणि केव्ही विश्वनाथन यांच्या खंडपीठाने हा निर्णय दिला.

न्यायालयाने म्हटले आहे की, " तथ्ये आणि परिस्थिती लक्षात घेता आणि देशात डॉक्टरांची तीव्र कमतरता असताना, वैद्यकीय जागा वाया जाऊ नये. तथापि, आम्ही स्पष्ट करतो की विशेष प्रवेश प्रक्रियेमुळे आधीच ठरलेल्या प्रवेशात अडथळा येऊ नये आणि प्रवेश फक्त प्रतीक्षा यादीतील उमेदवारांनाच दिला जाईल."
कोणत्याही महाविद्यालयाला विद्यार्थ्यांना थेट प्रवेश देऊ दिला जाणार नाही, ही प्रवेश प्रक्रिया फक्त राज्य प्रवेश प्राधिकरणांद्वारेच आयोजित केली जाईल, असेही न्यायालयाने स्पष्ट केले आहे.