मुंबई विद्यापीठाचे फेक वेळापत्रक व्हायरल, विद्यार्थी संभ्रमात..

एज्युवार्ता न्यूज नेटवर्क 

मुंबई विद्यापीठाकडून (Mumbai University) घेण्यात येणाऱ्या उन्हाळी सत्र परीक्षेचे (Summer semester exam) फेक वेळापत्रक सध्या सोशल मीडियासह इतर माध्यमांवर व्हायरल (Fake timetable goes viral) होत आहे. त्यामुळे परीक्षार्थी विद्यार्थी चांगलेच संभ्रमात पडल्याचे दिसून येत आहेत. कोणत्या वेळापत्रकानुसार परीक्षा घेतल्या जाणार असा प्रश्न विद्यार्थ्यांना लागून राहिला आहे. ही बाब लक्षात येताच विद्यार्थ्यांना सावधगिरी बाळगण्याचे आवाहन (Call for caution) विद्यापीठाकडून करण्यात आले आहे. 

मुंबई विद्यापीठाकडून घेण्यात येणाऱ्या पाच वर्षीय विधीच्या (बीएलएस/एलएलबी) १० व्या सत्राच्या परीक्षेबाबत एक बनावट वेळापत्रक तयार करून फिरत असल्याची माहिती समोर येत आहे. या वेळापत्रकात आगामी परीक्षांच्या तारखांमध्ये फेरबदल दर्शविण्यात आले आहेत. हे वेळापत्रक मुंबई विद्यापीठाचे अधिकृत वेळापत्रक नसून परीक्षेबाबत गैरसमज निर्माण करण्याच्या उद्देशाने तयार केलेले असू शकते. त्यामुळे संबंधित विद्यार्थ्यांनी याची नोंद घेऊन मुंबई विद्यापीठाच्या www.mu.ac.in या अधिकृत संकेतस्थळावरील वेळापत्रकावर विश्वास ठेवावा असे आवाहन परीक्षा व मूल्यमापन मंडळाच्या संचालक डॉ. पूजा रौंदळे यांनी सांगितले. 

मुंबई विद्यापीठाच्या अधिकृत वेळापत्रकाप्रमाणे पाच वर्षीय विधीच्या (बीएलएस/एलएलबी) १० व्या सत्राची परीक्षा ही बुधवार १६ एप्रिल २०२५ ते सोमवार ५ मे २०२५ या नियोजित कालावधीत घेतली जाणार आहे. त्यामुळे कोणत्याही माहितीची खात्री करण्यासाठी कृपया अधिकृत माध्यमांचा वापर करा आणि सोशल मीडियासह इतर माध्यमांवर फिरणाऱ्या कोणत्याही अनधिकृत माहितीवर विश्वास ठेवू नका, असे सांगत या बनावट वेळापत्रकाबाबत अधिक माहिती मिळाल्यास तात्काळ संबंधित प्रशासनाला कळवावे, जेणेकरून या गैरप्रकाराला वेळीच थांबवता येईल असेही त्यांनी सांगितले.