मुंबई विद्यापीठाकडे परदेशी विद्यार्थ्यांचा ओढा, २५८ विद्यार्थ्यांनी घेतले प्रवेश

एज्युवार्ता न्यूज नेटवर्क

मागील काही वर्षांपासून भारतीय विद्यार्थ्यांना परदेशी शिक्षणाकडे कल असल्याचे निदर्शनास येत होते. मात्र, आता चक्र उलट्या दिशेने फिरल्याचे समोर आले आहे. देशातील नामांकित विद्यापीठापैकी एक असलेल्या मुंबई विद्यापीठाकडे (Mumbai University) परदेशी विद्यार्थ्यांचा (Foreign students) ओढा पाहायला मिळत आहे. यंदा एकट्या मुंबई विद्यापीठात ६१ देशांतील २५८ विद्यार्थ्यांनी प्रवेश (258 students from 61 countries admitted to Mumbai University) घेतला आहे. त्यामुळे पुढील काळात भारतीय विद्यार्थ्यांना याकडे कशा पद्धतीने पाहातात हे महत्त्वाचे ठरणार आहे.

वैद्यकीय शिक्षणाच्या तब्बल ८ हजार जागा वाढणार; एमएमसी प्रमुखांची माहिती

यामध्ये प्रामुख्याने इटली, जपान, नॉर्वे, अमेरिका, इंग्लंड, न्यूझीलंड, कतार, कॅनडा, युएई, तैवान, युगांडा आदी देशांतील विद्यार्थ्यांचा समावेश आहे. मुंबई विद्यापीठाने उच्च शिक्षणाच्या आंतरराष्ट्रीयीकरणावर भर दिला आहे. त्याचाच भाग म्हणून परदेशी विद्यार्थ्यांना आकर्षित करण्याचे प्रयत्न केले जात आहेत. पदव्युत्तर अभ्यासक्रमासह मुंबई विद्यापीठाशी संलग्नित विविध महाविद्यालयांत बी.ए., बी. कॉम., बीएससी, बीए एमएमसी, आदी अभ्यासक्रमांसाठी विद्यार्थ्यांनी प्रवेश घेतला आहे.

मुंबई विद्यापीठात प्रवेश घेतलेल्या परदेशी विद्यार्थ्यांमध्ये भारतीय सांस्कृतिक संबंध परिषदेच्या (आयसीसीआर) माध्यमातून ९५ जणांचे प्रवेश झाले आहेत. आयसीसीआर या योजना अंतर्गत हे विद्यार्थी पूर्णपणे अनुदानित शिष्यवृत्तीवर आले आहेत. तर स्व खर्चाने १६३ विद्यार्थ्यांनी प्रवेश घेतले आहेत, अशी माहिती विद्यापीठ प्रशासनाकडून देण्यात आली आहे..

परदेशी विद्यार्थ्यांसाठी विद्यापीठाने ५०० हून अधिक अभ्यासक्रम उपलब्ध करून दिले आहेत. यातील ४०० हून अधिक अभ्यासक्रम जागतिक स्तरावर सुसंगत आहेत. त्यांना आंतरराष्ट्रीय क्रेडिटची मान्यता आहे. त्या जोडीला विद्यापीठाने नामांकित जागतिक विद्यापीठांसह संयुक्त पदवी अभ्यासक्रम सुरू केले आहेत. आंतरराष्ट्रीय परिषदा, प्राध्यापकांची देवाणघेवाण आणि सहयोगी संशोधनासारख्या प्रयत्नांमुळे आंतरराष्ट्रीय विद्यार्थ्यांना आकर्षित करण्यात यश मिळाले, असल्याचे सांगण्यात आले आहे.