शिक्षकांना TET परीक्षेसाठी इंग्रजी विषय सक्तीचा करा : प्रशांत बंब

एज्युवार्ता न्यूज नेटवर्क 

सर्वोच्च न्यायालयाच्या निर्णयामुळे सर्व शिक्षकांना टीईटी परीक्षा उत्तीर्ण होणे बंधनकारक झाले आहे. मात्र, त्यात काही शिक्षक इंग्रजी भाषा सक्तीची असताना पळवाट म्हणून हिंदी विषय टीईटी परीक्षेसाठी निवडत असल्याचा आरोप भारतीय जनता पक्षाचे आमदार प्रशांत बंब यांनी केला आहे. तसेच शैक्षणिक गुणवत्ता व पारदर्शकतेसाठी सर्व शिक्षकांना TET परीक्षेसाठी इंग्रजी विषय सक्तीचा करावा. हिंदी विषय निवडून TET परीक्षेत उत्तीर्ण होण्यासाठी नियमबाह्य पळवाट शिक्षकांनी शोधू नये, यासाठी शिक्षण विभागाने आवश्यक कार्यवाही करावी, या मागणीचे निवेदन प्रशांत बंब यांनी शालेय शिक्षणमंत्री दादा भुसे यांना दिले आहे.

शिक्षक पात्रता परीक्षेचा दर्जा टिकून राहण्यासाठी शिक्षण व्यवस्थेतील शिस्त व गुणवत्ता अबाधित ठेवण्यासाठी शालेय शिक्षण विभागाने आवश्यक उपाययोजना कराव्यात,  अशी मागणी आमदार प्रशांत बंब यांनी केली आहे. जिल्हा परिषद व अनुदानित शाळातील शिक्षक टीईटी परीक्षेमुळे धास्तावले आहेत. नोकरी टिकवणे व पदोन्नती मिळवणे याबाबत मोठी पंचायत निर्माण झाली आहे. सध्या स्थितीत काही शिक्षकांनी मराठी माध्यम असूनही इंग्रजी विषय टाळण्यासाठी हिंदी भाषा निवडून परीक्षा उत्तीर्ण होण्याची पळवाट शोधलेली आहे. पेपर क्रमांक एक व पेपर क्रमांक दोन साठी इंग्रजी ऐवजी हिंदी निवडून ते सहज उत्तीर्ण होत आहेत. मराठी माध्यमातील शिक्षकांसाठी टीईटी परीक्षेत मराठी, इंग्रजी ,परिसर अभ्यास ,गणित ,मानसशास्त्र हे पेपर 1 साठी बंधनकारक आहेत. तसेच पेपर 2 साठी मराठी, इंग्रजी, मानसशास्त्र, समाजशास्त्र किंवा गणित व विज्ञान हे विषय बंधनकारक आहेत. तरी देखील काही शिक्षकांनी इंग्रजी ऐवजी हिंदी निवडून परीक्षा उत्तीर्ण होण्याची नियमबाह्य पळवाट शोधली आहे. 

मराठी माध्यमातील शिक्षकांसाठी TET परीक्षेसाठी इंग्रजी भाषा सक्तीची करण्यात यावी, यासंदर्भातील नवीन परिपत्रक काढून आशा पळवटा कायमच्या बंद करण्यात याव्यात सर्व शिक्षकांनी त्यांच्या मूळ माध्यमानुसारच परीक्षा देणे बंधनकारक करण्यात यावे, परीक्षा प्रक्रियेतील पारदर्शकता गुणवत्ता व न्यायतेसाठी आवश्यक ती सुधारणा तातडीने करण्यात यावी, अशी मागणी प्रशांत बंब यांनी केली आहे.