UPSC परीक्षेत अपयशी उमेदवारांना नोकरी?; आयोगाकडून'प्रतिभा सेतू' योजना सुरू
यूपीएससीची ही योजना नवीन नाही. पूर्वदेखील यूपीएससी चांगल्या उमेदवारांची माहिती कंपन्यांना किंवा जिथे नोकऱ्या मिळू शकतात, तिथे पाठवत असे. आता उमेदवारांची सर्व माहिती प्रतिभा सेतू वेबसाइटवर उपलब्ध असेल.
eduvarta@gmail.com 
एज्युवार्ता न्यूज नेटवर्क
केंद्रीय लोकसेवा आयोगाच्या (UPSC) परीक्षेची तयारी करणारे देशभरात लाखो उमेदवार आहेत. मात्र, या सर्वाच विद्यार्थ्यांना परीक्षेत यश मिळतेच असे नाही. त्यामुळे अशा अपयशी विद्यार्थ्यांना (UPSC Fail Students) नोकरी देण्याचा निर्णय घेण्यात आला आहे. त्यामुळे देशभरातील लाखो विद्यार्थांना याचा फायदा होण्याची शक्यता वर्तवण्यात येत आहे. परीक्षेचा नादात या उमेदवारांचे वय पुढे सरकत जाते, आणि वयोमर्यादा (Age limit for candidates) लागू होतात. त्यामुळे ही खचून जाणारी मुले शेवटी कुठेतरी खासगी नोकरी करतात किंवा व्यवसायाची वाट धरतात. अशा उमेदवारांसाठी यूपीएससी 'प्रतिभा सेतू' नावाची एक नवी योजना (Pratibha Setu Yojana) राबवणार आहे.
युपीएससी परीक्षा पात्र होऊन IAS किंवा IPS बनण्याचे स्वप्न पाहणाऱ्या तरुणांना अशेचा एक नवीन किरण समोर आला आहे. अपयशी तरुणांसाठी यूपीएससीने एक योजना आणली आहे, ज्याद्वारे मुलाखत फेरीपर्यंत पोहोचणारे, परंतु उत्तीर्ण न होऊ शकलेल्या उमेदवारांना चांगल्या ठिकाणी नोकरी मिळणार आहे. यूपीएससीने 'प्रतिभा सेतू' नावाची योजना सुरू केली आहे. याद्वारे खाजगी आणि सरकारी संस्था त्या उमेदवारांशी थेट संपर्क साधू शकतील आणि त्यांच्या प्रतिभेचा योग्य वापर करू शकतील. म्हणजेच काय, तर त्यांना नोकरीच्या संधी दिल्या जातील.
यूपीएससीची ही योजना नवीन नाही. पूर्वदेखील यूपीएससी चांगल्या उमेदवारांची माहिती कंपन्यांना किंवा जिथे नोकऱ्या मिळू शकतात, तिथे पाठवत असे. आता उमेदवारांची सर्व माहिती प्रतिभा सेतू वेबसाइटवर उपलब्ध असेल. मंत्रालये, स्वायत्त विभाग, सार्वजनिक क्षेत्रातील उपक्रम आणि खाजगी कंपन्या प्रतिभा सेतू पोर्टलवर उमेदवारांची माहिती मिळवू शकतील.
या योजनेअंतर्गत, उमेदवारांचा बायोडेटा, ज्यामध्ये त्यांची शैक्षणिक पात्रता आणि संपर्क तपशील समाविष्ट आहेत. UPSC ने म्हटले आहे की, अशा 10,000 हून अधिक उमेदवारांचा डेटा प्रतिभा सेतूवर उपलब्ध करून दिला जाईल. यूपीएससीने म्हटले आहे की, नागरी सेवा परीक्षा आणि भारतीय वन सेवा, केंद्रीय सशस्त्र पोलिस दल, अभियांत्रिकी सेवा, संयुक्त भूगर्भशास्त्रज्ञ, संयुक्त संरक्षण सेवा, भारतीय आर्थिक सेवा / भारतीय सांख्यिकी सेवा परीक्षा आणि संयुक्त वैद्यकीय सेवेत अपयशी ठरलेल्या उमेदवारांचा या योजनेत समावेश करण्यात आला आहे.
