दहावी-बारावी पुरवणी परीक्षेचे हॉल तिकिट जाहीर; विद्यार्थ्यांसाठी मार्गदर्शक सूचना
दहावी पुरवणी परीक्षा १६ जून ते ३० जून २०२६ दरम्यान तर बारावी पुरवणी परीक्षा १६ जून ते ८ जुलै २०२६ पर्यंत होणार आहे. परीक्षा दोन सत्रांत घेण्यात येणार असून, सकाळी ११ ते दुपारी २ आणि दुपारी ३ ते संध्याकाळी ६ या वेळेत होईल. व्यावसायिक अभ्यासक्रमांसाठी वेगळे वेळापत्रक जारी करण्यात आले आहे.
eduvarta@gmail.com 
एज्युवार्ता न्यूज नेटवर्क
महाराष्ट्र राज्य माध्यमिक व उच्च माध्यमिक शिक्षण मंडळाने (MSBSHSE) जून-जुलै २०२६ मधील दहावी (SSC) आणि बारावी (HSC) पुरवणी परीक्षांसाठीचे ऑनलाइन हॉल तिकिट (Hall Ticket) आज जाहीर केले आहेत. विद्यार्थ्यांसाठी ही महत्त्वाची बातमी आहे. कारण मुख्य परीक्षेत अपुरे गुण मिळालेल्या किंवा एक-दोन विषयांत अनुत्तीर्ण झालेल्या विद्यार्थ्यांना (failed student) यावर्षीची संधी मिळणार आहे. मंडळाच्या अधिकृत वेबसाइटवर mahahsscboard.in हॉल तिकिट उपलब्ध झाले असून, संलग्न शाळा आणि कनिष्ठ महाविद्यालयांच्या मुख्याध्यापक व प्राचार्यांनी ते डाउनलोड करून विद्यार्थ्यांना वितरित करण्याचे निर्देश देण्यात आले आहेत.
दहावी पुरवणी परीक्षा १६ जून ते ३० जून २०२६ दरम्यान तर बारावी पुरवणी परीक्षा १६ जून ते ८ जुलै २०२६ पर्यंत होणार आहे. परीक्षा दोन सत्रांत घेण्यात येणार असून, सकाळी ११ ते दुपारी २ आणि दुपारी ३ ते संध्याकाळी ६ या वेळेत होईल. व्यावसायिक अभ्यासक्रमांसाठी वेगळे वेळापत्रक जारी करण्यात आले आहे. परीक्षा राज्यातील नऊ विभागीय केंद्रांवर (पुणे, नागपूर, मुंबई, कोल्हापूर, छत्रपती संभाजीनगर, अमरावती, नाशिक, लातूर आणि कोकण) घेण्यात येणार आहेत.
हॉल तिकिट कसे डाउनलोड करावे?
सर्वप्रथम अधिकृत संकेतस्थळ mahahsscboard.in वर जावे. तिथे‘HSC or SSC Supplementary Examinations - 2026 Hall Tickets’ लिंकवर क्लिक करा. जिल्हा, शाळा, विद्यार्थी नाव आणि जन्मतारीख प्रविष्ट करा.
‘Download Hall Ticket’ वर क्लिक करा आणि प्रवेशपत्र डाऊनलोड करून त्याची प्रिंट काढून घ्या. हॉल तिकिटावर विद्यार्थ्याचे नाव, रोल नंबर, विषय कोड, परीक्षा केंद्र, तारीख-वेळ आणि महत्त्वाच्या सूचना असतील. फोटो अस्पष्ट असल्यास शाळेने नवीन फोटो चिकटवून त्यावर सही, शिक्का मारावा. ते हरवल्यास ‘डुप्लिकेट’ म्हणून नवीन प्रिंट काढता येईल.
परीक्षेसाठी महत्त्वाच्या सूचना
हॉल तिकिटाशिवाय परीक्षा केंद्रावर प्रवेश मिळणार नाही, त्यामुळे परीक्षेचे प्रवेशपत्र सोबत ठेवा. इतर आवश्यक कागदपत्रे जसे की, ओळखपत्र पुरावा म्हणून आधार कार्ड, शाळेचे ओळखपत्र अशा गोष्टी सोबत ठेवा. परीक्षा केंद्रावर मोबाइल, कॅल्क्युलेटर किंवा इतर निर्धारित वस्तू घेऊ नका. वेळापत्रक काळजीपूर्वक तपासा आणि नियमित अपडेट तपासत रहा. शाळा-महाविद्यालयांनी कोणतेही अतिरिक्त शुल्क आकारू नये, असे स्पष्ट आदेश मंडळाने दिले आहेत. हॉल तिकिटावर मुख्याध्यापक किंवा प्राचार्यांची स्वाक्षरी आणि शिक्का असणे बंधनकारक आहे.
