गलगोटिया युनिव्हर्सिटीने घातली भारताची लाज, चीनचा रोबोटिक डाॅग स्वत: विकसित केल्याचा दावा

एज्युवार्ता न्यूज नेटवर्क 

दिल्लीत पार पडलेल्या आर्टिफिशियल इंटेलिजन्स इम्पॅक्ट समिटमध्ये (Artificial Intelligence Impact Summit) गलगोटिया युनिव्हर्सिटीने (Galgotia University) भारताची जगासमोर अक्षरश: लाज घातली (Literally embarrassed) आहे. आर्टिफिशियल इंटेलिजन्स समिटमध्ये गलगोटिया युनिव्हर्सिटीच्या वतीने रोबोटिक डाॅग प्रदर्शानासाठी (Robotic Dog Demonstration) ठेवण्यात आला होता. युनिव्हर्सिटीकडून हा रोबोट स्वत: विकसित केल्याचा दावा केला (Claim of developing dog fails) गेला. मात्र, सोशल मीडियावर नेटकऱ्यांनी हा रोबोट चीनमधून विकत घेतल्याचा आरोप करत गलगोटिया युनिव्हर्सिटीला ट्रोल केले. हा वाद एवढा वाढला की, युनिव्हर्सिटीला एआय समिटमधून हाकलण्यात आले. 

वादानंतर गलगोटिया युनिव्हर्सिटीने अधिकृत प्रसिद्धी पत्रक जारी करून जाहीर माफी मागितली आहे. युनिव्हर्सिटीने म्हटले की, "समिटमध्ये झालेल्या गोंधळाबद्दल आम्ही मनापासून माफी मागतो. आमच्या एका प्रतिनिधीला त्या उत्पादनाची तांत्रिक माहिती नव्हती आणि कॅमेऱ्यासमोर येण्याच्या उत्साहात तिने चुकीची माहिती दिली. वास्तविक, त्यांना प्रसारमाध्यमांशी बोलण्याचे अधिकार दिलेले नव्हते." 

इलेक्ट्रॉनिक्स आणि माहिती तंत्रज्ञान मंत्रालयाचे सचिव एस. कृष्णन यांनी या वादावर स्पष्टीकरण दिले. "दुसऱ्याचे काम स्वतःचे म्हणून सांगण्याच्या कृतीचे आम्ही समर्थन करत नाही. चुकीची माहिती पसरवणे चुकीचे आहे, म्हणूनच आम्ही या वादापासून लांब राहण्यासाठी युनिव्हर्सिटीला स्टॉल हटवण्यास सांगितले," असे एस. कृष्णन यांनी सांगितले.

"समिटमध्ये मांडलेल्या वस्तूंना सरकार आधीच प्रमाणपत्र देत नाही. हे एक नाविन्यपूर्ण व्यासपीठ आहे. जेव्हा एखादा संशोधक उत्पादन दाखवतो, तेव्हा त्याला त्याबद्दल पूर्ण माहिती असेल असे गृहीत धरले जाते. जर आम्ही प्रत्येक गोष्टीचे आधीच सर्टिफिकेशन करू लागलो, तर संशोधनावर मर्यादा येतील. सरकारचा उद्देश कोणाच्याही संशोधनाची गळचेपी करण्याचा नाही, मात्र पारदर्शकता असणे आवश्यक आहे," असेही एस. कृष्णन यांनी म्हटले.

गलगोटिया विद्यापीठाची स्थापना २०११ मध्ये झाली. उत्तर प्रदेशातील ग्रेटर नोएडा येथे ५२ एकरांवर पसरलेला त्यांचा परिसर आहे. सुनील गलगोटिया हे विद्यापीठाचे कुलपती आहेत आणि त्यांचा मुलगा ध्रुव गलगोटिया हे त्याचे सीईओ आहेत. सुनीलची मुलगी आराधना गलगोटिया ही विद्यापीठात ऑपरेशन्स डायरेक्टर आहे. विद्यापीठाला फार्मसी कौन्सिल ऑफ इंडिया, बार कौन्सिल ऑफ इंडिया, इंडियन नर्सिंग कौन्सिल, नॅशनल कौन्सिल फॉर टीचर एज्युकेशन आणि नॅशनल कौन्सिल फॉर हॉटेल मॅनेजमेंटच्या नॉर्म्सने देखील मान्यता दिली आहे.

गलगोटियास विद्यापीठाचा दावा आहे की, एका शैक्षणिक वर्षात ४० देशांतील अंदाजे ४०,००० विद्यार्थी येथे शिक्षण घेतात. जगभरातील ९६ देशांमध्ये त्यांचे १,००,००० हून अधिक माजी विद्यार्थी आहेत. हे युजीसी-मान्यताप्राप्त विद्यापीठ पॉलिटेक्निक, पदवीपूर्व, पदव्युत्तर आणि पीएचडी कार्यक्रम देते.

नेमका काय घडला प्रकार : 

गलगोटिया विद्यापीठाच्या महिला पदाधिकाऱ्यांनी चीनने विकसित केलेला रोबोट स्वतःचा असल्याचे सांगत हा रोबोट आमच्या विद्यापीठामध्ये आम्ही तयार केला असे छातीठोकपणे सांगितले होते. त्यावर केंद्रीय मंत्र्यांनी ट्विट केले होते. तसेच डीडी या शासकीय दूरचित्रवाहिनीने यासंदर्भातील व्हिडिओ प्रसिद्ध केला होता. मात्र  व्हिडिओ सोशल मीडियावर चांगलाच व्हायरल झाला. त्यावर संबंधित रोबोट हा सुमारे दोन वर्षांपूर्वीच तयार करण्यात आला असून तो ऑनलाइन दोन लाख रुपयांपर्यंत विकत मिळतो. असे असताना गलगोटिया विद्यापीठाने हा रोबोट स्वतःच विकसित केल्याचा दावा केला. त्यानंतर समाज माध्यमांवरून विद्यापीठावर टीकेची झोड उठविण्यात आली. पुढे विद्यापीठाने या संदर्भात माफीनामाही प्रसिद्ध केला. मात्र AI  समिटमधून विद्यापीठाला बाहेर काढण्यात आले. या समितीमध्ये जगभरातील अनेक देशांनी सहभाग घेतला होता. त्याच ठिकाणी असा प्रकार घडल्याने भारताची बदनामी झाली असल्याचे बोलले जात आहे.