स्वतंत्र दिव्यांग विद्यापीठ स्थापनेच्या हालचालींना वेग 

एज्युवार्ता न्यूज नेटवर्क 

राज्यातील दिव्यांग विद्यार्थ्यांना उच्च शिक्षण घेणे अधिक सोयीचे व्हावे, यासाठी राज्यात स्वतंत्र दिव्यांग विद्यापीठ (Disability University) स्थापन करण्यासाठी समिती स्थापना करण्यात आली असून या समितीने येत्या 15 ऑगस्टपर्यत आपला अहवाल राज्य शासनाला(State Government) सादर करावा, असे निर्देश राज्याचे उच्च व तंत्र शिक्षण मंत्री चंद्रकांत पाटील (Higher and Technical Education Minister Chandrakant Patil)यांनी दिले आहेत.

मंत्रालयात दिव्यांग विद्यापीठ निर्मितीसंदर्भात उच्च व तंत्रशिक्षण मंत्री चंद्रकांत पाटील यांच्या अध्यक्षतेखाली बैठक झाली. या बैठकीस आमदार प्रसाद लाड, आमदार बच्चू कडू, उच्च व तंत्र शिक्षण विभागाचे प्रधान सचिव विकासचंद्र रस्तोगी, उच्च शिक्षण संचालक डॉ. शैलेंद्र देवळाणकार, अध्यक्ष डॉ.मुरलीधर चांदेकर संबंधित अधिकारी आदी उपस्थित होते.

चंद्रकांत पाटील म्हणाले, राज्यातील दिव्यांग विद्यार्थ्यांसाठी स्वतंत्र दिव्यांग विद्यापीठ स्थापन करण्यासाठी उच्च व तंत्र शिक्षण मंत्री विभागाने माजी कुलगुरू डॉ. मुरलीधर चांदेकर यांच्या अध्यक्षतेखाली दिव्यांग विद्यापीठ स्थापन्यासाठी आवश्यक सोयी सुविधांचा अभ्यास करण्यासाठी समितीची नियुक्त करण्यात आली आहे. या समितीने सविस्तर अहवाल  15 ऑगस्टपर्यत  राज्य शासनाकडे तातडीने सादर करावा. हा अहवाल  मंत्रिमंडळासमोर  ठेऊन त्यावर सकारात्मक निर्णय घेण्यात येईल, त्यानंतर लवकरच स्वतंत्र दिव्यांग विद्यापीठ स्थापन करण्यात येईल.