दृष्य कला विद्यापीठाची स्थापना करा, ...अन्यथा कला प्रदर्शनावर बहिष्कार; संघटनांचा इशारा

  एज्युवार्ता न्यूज नेटवर्क 

राज्यात दृष्य कला विद्यापीठाची (University of Visual Arts) स्थापना करावी, राज्य लोकसेवा आयोगातर्फे (State Public Service Commission) राबविण्यात येणाऱ्या कला संस्थांमधील भरती प्रक्रियेसाठीच्या निकषांतून जीडी आर्ट आणि डिप्लोमा ए. ईडी हे अभ्यासक्रम वगळावेत, डिप्लोमा अभ्यासक्रमांचे रूपांतर डिग्री अभ्यासक्रमांत करावे आदी मागण्या त्वरित मान्य करण्याची मागणी महाराष्ट्र राज्य दृष्य कला विद्यापीठ कृती समितीने (Visual Arts University Action Committee) केली आहे. तसेच याबाबत लवकर निर्णय न घेतल्यास आगामी महाराष्ट्र राज्य कला प्रदर्शनावर बहिष्कार टाकण्याचा इशाराही कृती समितीने दिला आहे.

महाराष्ट्र राज्य कला मंडळ सुरू करण्यात आले आहे. कॉलेजांना या मंडळाकडून दरवर्षी मान्यता घ्यावी लागते. त्यासाठी मोठे शुल्क भरावे लागते. याचा भार कॉलेजांवर येत असल्याने विद्यार्थ्यांचे शैक्षणिक शुल्क वाढवले जातात. त्यामुळे हे मंडळ तात्काळ रद्द करावे. 

राज्यात दृश्य कला विद्यापीठ स्थापन झाल्यास सर्व अनुदानित आणि खासगी कला महाविद्यालये ही या विद्यापीठाच्या अंतर्गत येतील. त्यातून कॉलेजांना पाच वर्षांचा पदवी अभ्यासक्रम राबविता येईल. त्यामुळे हे विद्यापीठ स्थापन करण्याचा निर्णय लवकर घेण्यात यावा, अशी मागणी कृती समितीने केली आहे. 

राज्यातील कला महाविद्यालये कला संचालनालयाच्या अखत्यारित होती. मात्र आता कला महाविद्यालयांसाठी नव्याने महाराष्ट्र राज्य कला मंडळाची स्थापना करण्यात आली आहे. अनुदानित आणि खासगी कला महाविद्यालयांना या मंडळाची मान्यता घ्यावी लागते. १९८० च्या दशकात शासकीय महाविद्यालयांतील डिप्लोमा अभ्यासक्रमांचे रूपांतर पदवी अभ्यासक्रमात करण्यात आले. मात्र खासगी संस्थांमध्ये पाच वर्षांचा हा अभ्यासक्रम डिप्लोमा म्हणूनच ग्राह्य धरला जातो. त्यामुळे या डिप्लोमा अभ्यासक्रमाचे रुपांतरण पदवी अभ्यासक्रमात करण्याची परवानगी द्यावी, अशी मागणी समितीने केली आहे.