भारतीय अंतराळ संशोधन संस्थेत काम करण्याची सुवर्णसंधी, ४६० अॅप्रेंटिस ट्रेनी पदांसाठी थेट निवड सुरु 

एज्युवार्ता न्यूज नेटवर्क 

भारतीय अंतराळ संशोधन संस्थेच्या (ISRO) अंतर्गत येणाऱ्या तिरुवनंतपुरम येथील विक्रम साराभाई अंतराळ केंद्राने (VSSC) ॲप्रेंटिस ट्रेनी पदांसाठी मोठी संधी जाहीर केली आहे. या भरती प्रक्रियेद्वारे एकूण ४६० जागा भरण्यात येणार आहेत. यात २७३ पदवीधर प्रशिक्षणार्थी (Graduate Apprentice) आणि १८७ तंत्रज्ञ प्रशिक्षणार्थी (Technician Apprentice) पदांचा समावेश आहे. विशेष बाब म्हणजे या भरतीसाठी ऑनलाइन अर्ज प्रक्रिया नसून, थेट वॉक-इन सिलेक्शन (Walk-in selection) ड्राइव्हद्वारे निवड केली जाणार आहे.

विक्रम साराभाई केंद्राने प्रसिद्ध केलेल्या अधिसूचनेनुसार, ही निवड प्रक्रिया शनिवार, २५ जुलै २०२६ रोजी सकाळी ९:३० ते संध्याकाळी ५:०० वाजेदरम्यान राबवली जाणार आहे. उमेदवारांना ‘कार्तिका थिरुनल शासकीय व्ही. अँड जी.एच.एस.एस. फॉर गर्ल्स, मणकौड, तिरुवनंतपुरम, केरळ’ या ठिकाणी निर्धारित वेळेत उपस्थित राहावे लागेल. सर्व मूळ कागदपत्रे आणि प्रमाणपत्रांसह उमेदवारांनी हजर राहणे आवश्यक आहे.

पदवीधर प्रशिक्षणार्थी अभियांत्रिकी पदासाठी किमान ६५% गुणांसह किंवा ६.८४ CGPA सह अभियांत्रिकी पदवी आवश्यक आहे. हॉटेल मॅनेजमेंटसाठी ६०% गुणांसह प्रथम श्रेणी पदवी, तर इतर सामान्य पदवीधरांसाठी ६०% गुणांसह तीन वर्षांची पदवी अपेक्षित आहे. तंत्रज्ञ प्रशिक्षणार्थी पदासाठी प्रथम श्रेणीतील तीन वर्षांचा अभियांत्रिकी डिप्लोमा किंवा कमर्शिअल प्रॅक्टिस डिप्लोमा आवश्यक आहे. वयोमर्यादा ३१ जुलै २०२६ रोजी गणली जाईल.

निवड झालेल्या उमेदवारांना एक वर्षाचे प्रशिक्षण दिले जाईल. तंत्रज्ञ प्रशिक्षणार्थ्यांना दरमहा १०,९०० रुपये आणि पदवीधर प्रशिक्षणार्थ्यांना १२,३०० रुपये मानधन मिळणार आहे. ही संधी अंतराळ संशोधन क्षेत्रात करिअर घडवू इच्छिणाऱ्या तरुणांसाठी उपयुक्त ठरेल. पात्र आणि इच्छुक उमेदवारांनी २५ जुलै रोजी सकाळी ९:३० पूर्वीच केंद्रस्थळी पोहोचावे. अधिक तपशील आणि अधिसूचना www.vssc.gov.in या अधिकृत वेबसाइटवर उपलब्ध आहे. ISRO सारख्या प्रतिष्ठित संस्थेत प्रशिक्षण घेण्याची ही दुर्मिळ संधी गमावू नका, असे आवाहन केंद्रातर्फे करण्यात आले आहे.