सर्व विद्यापीठांमध्ये हवामान बदलाचा विषय शिकवला जावा; राज्यपाल राधाकृष्णन 

एज्युवार्ता न्यूज नेटवर्क 

शिक्षणाच्या माध्यमातून पर्यावरण संवर्धनाचे धडे देणे गरजेचे आहे. त्यासाठी पर्यावरण संवर्धन किंवा संरक्षण असा विषय (Environmental change topic) प्रत्येक विद्यापीठात शिकविला जावा. त्यातून पर्यावरण रक्षणाच्या नव्या कल्पना जन्माला येतील. नवे प्रयोग होतील. त्यातूनच संवर्धनाचे नवनवे मार्गही गवसतील, असा विश्वास राज्यपाल सी. पी. राधाकृष्णन (Governor C. P. Radhakrishnan) यांनी व्यक्त केला.

चंद्रपूर येथील प्रियदर्शिनी इंदिरा गांधी सभागृहात एसएनडीटी महिला विद्यापीठ व सीटी युनिव्हर्सिटी ऑफ न्यूयॉर्क यांच्या संयुक्त विद्यमाने आयोजित तीन दिवसीय 'इंटरनॅशनल कॉन्फरन्स ऑन क्लायमेट चेंज' या कार्यक्रमाचे उ‌द्घाटन राज्यपाल राधाकृष्णन यांच्या हस्ते पार पडले. त्यावेळी ते  बोलत होते. यावेळी आमदार सुधीर मुनगंटीवार, जलपुरुष राजेंद्र सिंह यांच्यासह अन्य मान्यवर उपस्थित होते. याप्रसंगी राज्यपालांच्या हस्ते 'इंटरनॅशनल कॉन्फरन्स बुक प्रोसिडिंग' या पुस्तकाचे प्रकाशन करण्यात आले.

एसएनडीटी विद्यापीठाने चंद्रपूरसारख्या दुर्गम जिल्ह्यात उपकेंद्र सुरू करून येथील महिलांना कौशल्य विकासाचे दालन उघडे करून दिले आहे. हे विद्यापीठ महिलांना खऱ्या अर्थाने सक्षम करण्याचे काम करेल, असा आशावादही राज्यपाल राधाकृष्णन यांनी व्यक्त केला. जलपुरुष राजेंद्र सिंह म्हणाले, जल, जमीन, जंगल वाचले, तरच आपली संस्कृतीही वाचणार आहे. 

सुधीर मुनगंटीवार म्हणाले, यंदा संविधनाचे अमृतमहोत्सवी वर्ष आहे. संविधानाने आपल्याला दिलेले हक्क सर्वांना माहिती आहे. पण संविधनाने दिलेल्या जबाबदारीचा आणि कर्त्यव्याचा आपलाला विसर पडत चालला आहे. तीन दिवसांच्या परिषदेत पर्यावरण संवर्धनाच्या कर्तव्यावर चर्चा होईल, असा विश्वास आहे. त्यासाठी लोकशिक्षण, कृती आणि अंमलबजावणी यावर भर दिला पाहिजे. 'सी फॉर चंद्रपूर, सी फॉर क्लॉयमेट चेंज'च्या युद्धात सर्वात आघाडीवर राहिल, असा विश्वास त्यांनी यावेळी व्यक्त केला.