अकोल्यात शिक्षकानेच केला सहा विद्यार्थिंनींचा विनयभंग 

एज्युवार्ता न्युज नेटवर्क 

बदलापूर (Badlapaur Rape Case) येथील अत्याचाराची घटना ताजी असतानाच अकोल्यात (Akola) जिल्हा परिषदेच्या शाळेतून (Zilla Parishad School) असाच एक संतापजनक प्रकार समोर आला आहे. अकोल्यातील जिल्हा परिषदेच्या शाळेतील शिक्षकाने शिक्षकी पेशाला काळिमा फासणारे कृत्य केले आहे. एका विकृत शिक्षकाने (Teacher) सहा शालेय विद्यार्थिंनींना (students) अश्लील व्हिडिओ दाखवून त्यांचा विनयभंग (molestation) केला आहे. त्यामुळे खळबळ उडाली आहे.  

अकोला जिल्ह्यातील बाळापूर तालुक्यातील जिल्हा परिषदेच्या उच्च माध्यमिक शाळेतील शिक्षकाने अश्लील व्हिडिओ पाहून 6 विद्यार्थिंनींवर अत्याचार केल्याची घटना समोर आली आहे. प्रमोद सरदार नावाच्या शिक्षकाने शाळेतील ६ मुलींना अश्लील व्हिडीओ दाखवून त्यांच्यावर विनयभंग केल्याचा  आरोप आहे. पीडित मुलींच्या पालकांना या गंभीर घटनेबाबत समजल्यानंतर संपूर्ण जिल्ह्यातून संताप व्यक्त केला जात आहे.  ही घटना मंगळवारी (20 ऑगस्ट) दुपारी चारच्या सुमारास उघडकीस आली. या प्रकरणांमध्ये आरोपी शिक्षकाविरुद्ध पोलीस ठाण्यात गुन्हा दाखल करण्यात आला आहे.

दरम्यान, शालेय शिक्षणमंत्री दीपक केसकर (Dipak Kesarkar) यांनी अकोल्यातील शिक्षकांवर कडक कारवाई करणार असल्याचे आश्वासन दिले आहे. सदर शिक्षक चार महिन्यांपासून आठवीत शिकणाऱ्या मुलींना अश्लील व्हिडीओ दाखवून त्यांना चुकीच्या पद्धतीने स्पर्श करायचा,असा आरोप करण्यात आला आहे. त्यानंतर एका विद्यार्थिनीने चाईल्ड वेलफेयर सेंटरच्या टोल फ्री हेल्पलाईनवर फोन करून घटनेची माहिती दिली. त्यानंतर केंद्रातील अधिकारी शाळेत पोहोचले आणि त्यांनी या प्रकरणाचा तपास सुरु केला. या प्रकरणी उराल पोलिसांनी तातडीनं आरोपी शिक्षक प्रमोद सरदारवर पोक्सो कायद्यांतर्गत गुन्हा दाखल करून त्याला अटक केली.