महावितरणच्या परीक्षेला डमी उमेदवार बसला, पर्यवेक्षकाच्या सतर्कतेमुळे डाव फसला.. 

एज्युवार्ता न्यूज नेटवर्क 

महावितरणच्या ऑनलाइन परीक्षेत डमी उमेदवाराने (Dummy candidate took the exam) परीक्षा दिल्याचा धक्कादायक प्रकार विष्णुपुरी येथील सहयोग कॅम्प परीक्षा केंद्रावर (Vishnupuri Collaboration Camp Examination Centre) उघडकीस आला आहे. डमी उमेदवार बसला, मात्र  पर्यवेक्षकाच्या सतर्कतेमुळे डाव फसला आहे. या प्रकरणी छत्रपती संभाजीनगर येथील दोघांवर फसवणुकीचा गुन्हा दाखल (Fraud case registered) करण्यात आला आहे.

नोकरभरतीच्या परीक्षेत घोटाळे होण्याचे प्रकार थांबण्याचे नाव घेत नाहीत. याउलट त्याचे प्रमाण वाढताना समोर येत आहे. त्यामुळे सर्वच परीक्षा मागच्या काही वर्षापासून संशयाच्या भोवऱ्यात अडकल्या आहेत. दरम्यान, २४ ऑक्टोबर रोजी विष्णुपुरी येथील सहयोग कॅम्पसमधील आयऑन डिजिटल झोन येथे सकाळी ११ ते २ यावेळेत महावितरण कंपनीतील असिस्टंट इंजिनिअर या पदासाठी परीक्षा टाटा कन्सलटन्सी सर्व्हिसेस (TCS) मार्फत घेण्यात आली.

यावेळी मूळ परीक्षार्थी असलेल्या श्रीकांत श्रीनिवास सानप (२४, रा. छत्रपती संभाजीनगर) याच्या जागी डमी उमेदवार म्हणून अर्जुनसिंग चुडाराम राजपूत (२४, रा. संजरपूर, ता. वैजापूर) याने परीक्षा हॉलमध्ये प्रवेश केला. त्याने बनावट परीक्षा हॉलतिकीट तयार करून घेतले होते. मात्र, त्याच्यावर परीक्षा हॉमधील पर्यवेक्षकाला संशय आल्याने त्याची चौकशी केली असता तो मूळ परीक्षार्थी नसल्याचा प्रकार समोर आला. त्यानंतर पोलिसांना कळविण्यात आले. डमी परीक्षार्थी अर्जुनसिंग राजपूत यास पोलिसांच्या ताब्यात देण्यात आले.
______________________________

भाजप सरकारने आणलेला पेपरफुटी कायदा अत्यंत कुमकुवत आहे. त्यामुळे राज्यातील तरुणांच्या मनात आपली फसवणूक झाल्याची भावना आहे. जन्मठेपेसारखी कठोर शिक्षा या पेपरफुटी कायद्यात नाही. त्यामुळेच पेपर फोडणाऱ्यांचे धाडस आजही कायम आहे. 

स्पर्धा परीक्षा समन्वय समिती, महाराष्ट्र राज्य