UPPSC आयोगाच्या 'त्या' निर्णयाविरोधात २५ हजार तरूण रस्त्यावर
उत्तर प्रदेश लोकसेवा आयोगाने PCS प्रीलिम्स परीक्षा 2024 आणि RO-ARO 2023 च्या भरती परीक्षांमध्ये सामान्यीकरण प्रणाली लागू करण्याचा निर्णय नुकताच घेण्यात आला. त्यानंतर या निर्णयाविरोधात निषेध नोंदवण्यासाठी प्रयागराजमध्ये तब्बल 25 हजार परीक्षार्थी विद्यार्थी रस्त्यावर उतरले आहेत.
eduvarta@gmail.com 
एज्युवार्ता न्यूज नेटवर्क
उत्तर प्रदेश लोकसेवा आयोगाने (UPPSC) PCS प्रीलिम्स परीक्षा 2024 आणि RO-ARO 2023 च्या भरती (Examinations of PCS-Pre and RO-ARO)परीक्षांमध्ये सामान्यीकरण प्रणाली (normalization system) लागू करण्याचा निर्णय नुकताच घेण्यात आला. त्यानंतर या निर्णयाविरोधात
निषेध नोंदवण्यासाठी प्रयागराजमध्ये तब्बल 25 हजार परीक्षार्थी विद्यार्थी रस्त्यावर उतरले आहेत. आंदोलक विद्यार्थी ढोल ताशे वाजवत आयोागाच्या निर्णयाविरोधात जोरदार घोषणाबाजी देत आहेत.
प्रयागराजमध्ये 25 हजारांहून अधिक विद्यार्थी उत्तर प्रदेश लोकसेवा आयोगाच्या कार्यालयाबाहेर धरणे आंदोलन करत आहेत. आंदोलक विद्यार्थ्यांनी खुल्या जागेत रात्र काढली आणि बुधवार सकाळपासून पुन्हा निदर्शने करत आयोगाचे अध्यक्ष संजय श्रीनेत यांच्याविरोधात घोषणाबाजी केली. त्यामुळे शहरात मागील दोन दिवस झाले गोंधळाचे वातावरण पाहायला मिळत आहे.
आयोगाकडून 7 आणि 8 डिसेंबर रोजी आयोग 411 पदांसाठी पीसीएस परीक्षा घेत असल्याचे विद्यार्थ्यांचे म्हणणे आहे. ही परीक्षा 41 जिल्ह्यांत घेतली जात असून ती सर्व 75 जिल्ह्यांत एकाच दिवशी एकाच शिफ्टमध्ये घेण्यात यावी. भरती प्रक्रिया सुरू झाल्यानंतर परीक्षेच्या नियमात बदल करणे योग्य नाही, अशी विद्यार्थ्यांची मागणी आहे.
अलीकडेच, उत्तर प्रदेश लोकसेवा आयोगाने स्पर्धा परीक्षांमध्ये सामान्यीकरण प्रणाली लागू करण्याबाबत नोटीस प्रसिद्ध केली. कोणतीही परीक्षा दोन किंवा त्यापेक्षा जास्त दिवस राहिल्यास त्याचे पर्सेंटाइलच्या आधारे मूल्यमापन केले जाईल. मात्र, एक दिवसाची परीक्षा असेल तर त्यात ही पद्धत लागू होणार नाही, असे या नोटिशीत सांगण्यात आले होते. UPPSC ने माहिती दिली की PCS प्रीलिम्स परीक्षा 2024 आणि RO-ARO 2023 च्या भरती परीक्षांमध्ये सामान्यीकरण प्रणाली लागू केली जाईल. त्यानंतर विद्यार्थ्यांचा हा आक्रोश पाहायला मिळत आहे.
