SPPU:विद्यापीठातर्फे 8 हजार 804 विद्यार्थ्यांची CET प्रॉक्टर पद्धतीने; 11 ते 13 जून दरम्यान परीक्षा
सावित्रीबाई फुले पुणे विद्यापीठातील विविध विभागातील प्रवेशासाठी प्रवेश पूर्व परीक्षा घेतली जाते. मात्र काही विभागांसाठी उपलब्ध जागांपेक्षा कमी विद्यार्थ्यांनी अर्ज केल्यामुळे या अभ्यासक्रमाच्या प्रवेशासाठी परीक्षा घेतली जाणार नाही. संबंधित जागांवर विद्यार्थ्यांना थेट प्रवेश दिला जाणार आहे.
eduvarta@gmail.com 
एज्युवार्ता न्यूज नेटवर्क
सावित्रीबाई फुले पुणे विद्यापीठातील विविध विभागांमध्ये अभ्यासक्रमांच्या प्रवेशासाठी 11 ते 13 जून या कालावधीत प्रॉक्टर पद्धतीने ऑनलाइन CET परीक्षा घेतली जाणार आहे. विद्यापीठातर्फे 8 हजार 804 विद्यार्थ्यांची परीक्षा आयोजित करण्यात आली असून विद्यार्थी घरी बसून सुद्धा ही परीक्षा देऊ शकणार आहेत. NEET परीक्षेच्या गोंधळामुळे विद्यापीठाला ऑनलाइन परीक्षा घेण्यासाठी सेंटर उपलब्ध न झाल्यामुळे विद्यापीठाने प्रॉक्टर पद्धतीने परीक्षा घेण्याचा मार्ग स्वीकारला आहे.
सावित्रीबाई फुले पुणे विद्यापीठातील विविध विभागातील प्रवेशासाठी प्रवेश पूर्व परीक्षा घेतली जाते. मात्र काही विभागांसाठी उपलब्ध जागांपेक्षा कमी विद्यार्थ्यांनी अर्ज केल्यामुळे या अभ्यासक्रमाच्या प्रवेशासाठी परीक्षा घेतली जाणार नाही. संबंधित जागांवर विद्यार्थ्यांना थेट प्रवेश दिला जाणार आहे. विद्यापीठातील अनेक अभ्यासक्रमांना प्रवेश घेणाऱ्या विद्यार्थ्यांच्या संख्येत गेल्या काही वर्षांपासून घट होत चालली आहे. त्यामुळे विद्यापीठासाठी ही चिंतेची बाब आहे.
विद्येचे माहेरघर म्हणून ओळखल्या जाणाऱ्या पुण्यात खाजगी विद्यापीठाची संख्या वाढत आहे. त्याचप्रमाणे पारंपरिक अभ्यासक्रमाऐवजी विद्यार्थी व्यावसायिक अभ्यासक्रमांना पसंती देत आहेत. तसेच जिल्हा व तालुका स्तरावर पदव्युत्तर पदवी अभ्यासक्रम उपलब्ध झाले आहेत. त्यामुळे विद्यापीठात येऊन प्रवेश घेणे ऐवजी विद्यार्थी आपल्या घराजवळीलच महाविद्यालयात पदव्युत्तर पदवी अभ्यासक्रमास प्रवेश घेत आहेत.
MSC व्हायरलॉजी अभ्यासक्रमासाठी 348, MSC मायक्रोबायोलॉजी, अभ्यासक्रमासाठी 623, MA सायकॉलॉजी अभ्यासक्रमासाठी 589 , MSC फिजिक्स अभ्यासक्रमासाठी 300,MSC कम्प्युटर सायन्ससाठी 729, MSC केमिस्ट्री साठी 769, एलएलएम अभ्यासक्रमासाठी 486 विद्यार्थ्यांनी प्रवेश पूर्व परीक्षेसाठी अर्ज केले आहेत.बहुतांश अभ्यासक्रमास 100 पेक्षा कमी अर्ज आले आहेत.
----------------
विद्यापीठाने CET परीक्षा प्रॉक्टर पद्धतीने का घेतली?
विद्यापीठाने परीक्षा विविध केंद्रांवर ऑनलाईन पद्धतीने CET घेण्याचे नियोजन केले होते.मात्र, नीट परीक्षेचा पेपर फुटल्यामुळे पुन्हा एकदा NEET परीक्षा आयोजित करण्याची वेळ आली. नीट परीक्षेसाठी सर्व परीक्षा केंद्र बुक करण्यात आले आहेत. या परीक्षा केंद्रांवर विद्यापीठाला परीक्षा घेणे शक्य नाही. जुलै महिन्यात परीक्षा घेतल्यास त्याचा निकाल जाहीर करून प्रत्यक्षात प्रवेश प्रक्रिया सुरू होण्यास उशीर होईल. त्यामुळे विद्यापीठाने परीक्षा केंद्रावरील ऑनलाइन परीक्षा ऐवजी प्रॉक्टर पद्धतीने परीक्षा घेण्याचा निर्णय घेतला, असे विद्यापीठातील अधिकाऱ्यांकडून सांगितले जात आहे.
विद्यापीठ परीकशेतील गैरप्रकार कसे रोखणार?
प्रॉक्टर पद्धतीने परीक्षा घेतली जाणार असल्याने विद्यार्थ्यांना घरी बसूनही ऑनलाईन पद्धतीने परीक्षा देता येईल. परीक्षेत गैरप्रकार होऊ नये, या उद्देशाने विद्यापीठाने काळजी घेतली आहे. यावेळी ह्यूमन प्रॉक्टर पद्धतीचा विद्यापीठाने अवलंब केला आहे. परीक्षा देणाऱ्या विद्यार्थ्यांवर लक्ष ठेवले जाणार असून ऑनलाईन परीक्षेदरम्यान एकापेक्षा जास्त चेहरे स्क्रीनवर दिसणे, विद्यार्थ्यांची सातत्याने हालचाल होणे, परीक्षा सुरू असताना कम्प्युटरवर वेगळा टॅब ओपन करणे, अशा प्रत्येक हालचालींवर लक्ष ठेवले जाणार आहे.चूकीच्या बाबी निदर्शनास आल्यानंतर वॉर्निंग देऊन नंतर संबंधित विद्यार्थ्यांचे लॉग इन बंद केले जाईल.
