अभियांत्रिकी प्रवेश नोंदणीला १९ जुलैपर्यंत मुदतवाढ; प्रवेशाचे संपूर्ण वेळापत्रक जाहीर
सीईटी कक्षाने जाहीर केलेल्या वेळापत्रकानुसार २२ जुलै रोजी तात्पुरती गुणवत्ता यादी प्रसिद्ध केली जाईल. त्यानंतर २३ ते २५ जुलैदरम्यान हरकती स्वीकारल्या जातील, तर अंतिम गुणवत्ता यादी २७ जुलै रोजी प्रसिद्ध होईल. त्याच दिवशी पहिल्या कॅप फेरीसाठी सीट मॅट्रिक्स जाहीर करण्यात येईल.
Eduvarta
एज्युवार्ता न्यूज नेटवर्क
महाराष्ट्र राज्य सामाईक प्रवेश परीक्षा (सीईटी) कक्षाने शैक्षणिक वर्ष २०२६-२७ मधील अभियांत्रिकी (बीई/बी.टेक.) अभ्यासक्रमाच्या प्रवेश प्रक्रियेसाठी नोंदणीची मुदत १९ जुलैपर्यंत वाढविली असून प्रवेश प्रक्रियेचे संपूर्ण वेळापत्रकही जाहीर केले आहे. यानुसार पहिली कॅप (CAP) फेरी २८ जुलैपासून सुरू होणार असून संपूर्ण प्रवेश प्रक्रिया १५ सप्टेंबर २०२६ रोजी पूर्ण होणार आहे.
सीईटी कक्षाने दिलेल्या माहितीनुसार, अभियांत्रिकी प्रवेशासाठी ऑनलाइन नोंदणी २ जुलैपासून सुरू झाली असून आतापर्यंत २ लाख ६१ हजार ६६९ विद्यार्थ्यांनी नोंदणी केली आहे. मागील वर्षी ही संख्या २ लाख २५ हजार ४४३ इतकी होती. एप्रिल व मे २०२६ मध्ये झालेल्या एमएएच-सीईटी परीक्षेला बसलेल्या विद्यार्थ्यांनी केंद्रीभूत प्रवेश प्रक्रियेसाठी ऑनलाइन अर्ज करण्याचे आवाहन करण्यात आले आहे.
प्रवेशासाठी अर्ज करताना विद्यार्थ्यांनी आवश्यक कागदपत्रे स्कॅन करून अपलोड करावीत. अर्ज पडताळणीसाठी 'ई-स्क्रूटिनी' (E-Scrutiny) किंवा 'फिजिकल स्क्रूटिनी' (Physical Scrutiny) या दोन पर्यायांपैकी एकाची निवड करता येणार आहे. ई-स्क्रूटिनीची निवड केल्यास संपूर्ण पडताळणी ऑनलाइन होणार असून विद्यार्थ्यांना प्रत्यक्ष उपस्थित राहण्याची आवश्यकता नाही. मात्र, फिजिकल स्क्रूटिनीची निवड करणाऱ्या विद्यार्थ्यांना संबंधित पडताळणी केंद्रात प्रत्यक्ष जाऊन कागदपत्रांची पडताळणी करावी लागणार आहे.
एमएएच-सीईटी २०२६ साठी नोंदणी केलेल्या विद्यार्थ्यांना अभियांत्रिकी प्रवेश नोंदणीसाठी कोणतेही स्वतंत्र शुल्क भरावे लागणार नाही. मात्र, एनआरआय, ओसीआय, पीआयओ, आखाती देशांतील भारतीय कामगारांची मुले तसेच परदेशी नागरिकांना नियमानुसार शुल्क भरावे लागणार आहे.
सीईटी कक्षाने जाहीर केलेल्या वेळापत्रकानुसार २२ जुलै रोजी तात्पुरती गुणवत्ता यादी प्रसिद्ध केली जाईल. त्यानंतर २३ ते २५ जुलैदरम्यान हरकती स्वीकारल्या जातील, तर अंतिम गुणवत्ता यादी २७ जुलै रोजी प्रसिद्ध होईल. त्याच दिवशी पहिल्या कॅप फेरीसाठी सीट मॅट्रिक्स जाहीर करण्यात येईल. २८ ते ३० जुलैदरम्यान विद्यार्थ्यांना विकल्प अर्ज (ऑप्शन फॉर्म) भरता येणार असून २ ऑगस्ट रोजी पहिल्या फेरीतील जागावाटप जाहीर केले जाईल. ३ ते ५ ऑगस्टदरम्यान विद्यार्थ्यांना जागा स्वीकारून संबंधित महाविद्यालयात प्रवेश निश्चित करावा लागेल.
सीईटी कक्षाच्या माहितीनुसार, अभियांत्रिकी प्रवेशासाठी एकूण चार कॅप फेऱ्या पार पडणार असून त्यानंतर संस्थास्तरीय प्रवेश प्रक्रिया राबविण्यात येईल. सर्व प्रवेश प्रक्रिया १५ सप्टेंबर २०२६ रोजी सायंकाळी ५ वाजेपर्यंत पूर्ण होणार आहे. प्रवेशासंदर्भातील सविस्तर वेळापत्रक व अद्ययावत माहिती विद्यार्थ्यांनी सीईटी कक्षाच्या अधिकृत संकेतस्थळावर पाहावी, असे आवाहन करण्यात आले आहे.
