UPSC ला मिळाले नवीन अध्यक्ष 

एज्युवार्ता न्यूज नेटवर्क 

 केंद्रीय लोकसेवा आयोगाच्या (union public service commission) UPSC माजी अध्यक्षा प्रीती सुदान यांचा कार्यकाळ २९ एप्रिल रोजी पूर्ण झाल्यानंतर अध्यक्षपद रिक्त होते. आता १९८५ बॅचचे निवृत्त आयएएस अधिकारी अजय कुमार यांची या पदावर नियुक्ती करण्यात आली आहे. (Ajay Kumar appointed as Chairperson) अजय कुमार यांना ४० वर्षांहून अधिक प्रशासकीय अनुभव आहे. अजय कुमार २०२७ पर्यंत यूपीएससी अध्यक्षपदावर राहतील. 
माजी संरक्षण सचिव डॉ. अजय कुमार यांनी यापूर्वी संरक्षण सचिव म्हणून काम पाहिले आहे. ते भारतीय प्रशासकीय सेवेचे (IAS) १९८५ च्या बॅचचे केरळ कॅडर अधिकारी आहेत. याशिवाय, ते २३ ऑगस्ट २०१९ ते ३१ ऑक्टोबर २०२३ पर्यंत भारत सरकारचे संरक्षण सचिव होते. संरक्षण सचिव म्हणून त्यांनी अनेक महत्त्वाच्या सुधारणांचे नेतृत्व केले. अग्निपथ योजना आणण्यात आणि संरक्षण प्रमुख (सीडीएस) हे पद निर्माण करण्यात अजय कुमार यांनी महत्त्वाची भूमिका बजावली. त्यांनी आयुध कारखान्यांचे कॉर्पोरेटायझेशन आणि 'आत्मनिर्भर भारत' संरक्षण उपक्रमातही योगदान दिले.
अजय कुमार यांच्या प्रशासकीय कारकिर्दीची सुरुवात केरळच्या सरकारी कंपनी 'कॅल्ट्रॉन' पासून झाली. त्यांनी पलक्कडमध्ये जिल्हाधिकारी पदही भूषविले. नंतर त्यांनी केरळ सरकारच्या माहिती तंत्रज्ञान विभागात मुख्य सचिव म्हणूनही काम केले.

UPSC चे नवे अध्यक्ष अजय कुमार यांच्याकडे अनेक पदव्या आहेत. त्यांनी आयआयटी कानपूरमधून बी.टेक पदवी प्राप्त केली आहे. त्यांनी अमेरिकेतील मिनेसोटा विद्यापीठातून अर्थशास्त्रात पदव्युत्तर पदवी तसेच व्यवसाय प्रशासनात पीएचडी मिळवली. ते इंडियन नॅशनल अकादमी ऑफ इंजिनिअर्सचे फेलो देखील राहिले आहेत.