SPPU : हिवाळी सत्र परीक्षा अर्ज भरण्याची मुदत 'या' तारखेपर्यंत वाढवली

एज्युवार्ता न्यूज नेटवर्क

सावित्रीबाई फुले पुणे विद्यापीठाच्या (Savitribai Phule Pune University) शैक्षणिक वर्ष २०२५-२६ मधील हिवाळी सत्र परीक्षेसाठी (Winter semester exams for the academic year 2025-26) आठवा टप्पा जाहीर करण्यात आला आहे. यात विद्यार्थ्यांना मंगळवार १४ ऑक्टोबरपर्यंत (Deadline until October 14) परीक्षा अर्ज भरता येणार आहेत. विद्यार्थ्यांकडून कोणताही विलंब किंवा अतिविलंब शुल्क आकारण्यात येणार नाही, असे विद्यापीठाच्या परीक्षा व मूल्यमापन मंडळाचे प्रभारी संचालक डॉ. प्रभाकर देसाई (Dr. Prabhakar Desai) यांनी स्पष्ट केले आहे.

अजब प्रकार! इतिहासात पहिल्यांच शिक्षणाधिकारी करणार मुख्याध्यापकाविरोधात उपोषण

महाविद्यालयाने परीक्षा अर्ज कायम (Inward) केल्यानंतर विद्यार्थ्यांनी तात्काळ परीक्षा शुल्क ऑनलाईन स्वरुपात अदा करणे अनिवार्य आहे. तसेच दिनांक १६ ऑक्टोबर सायंकाळी ५.०० नंतर विद्यार्थी नियमित शुल्क भरू शकणार नाहीत आणि पर्यायाने संबंधित विद्यार्थ्याचा परीक्षा अर्ज विद्यापीठाकडे जमा होणार नाही त्या विद्यार्थ्यास परीक्षेपासून वंचित राहावे लागेल, याची विद्यार्थ्यांनी व संबंधित सर्व घटकांनी नोंद घ्यावी, असे विद्यापीठाकडून स्पष्ट करण्यात आले आहे.

विद्यार्थ्याने परीक्षा अर्ज वेळेत भरून महाविद्यालयाकडे ऑनलाईन जमा केल्यावर आणि Preview Print सादर केल्यावर जर संबंधित महाविद्यालयाकडून विद्यार्थ्यांचा अर्ज कायम झाला नाही तर सदरच्या विद्यार्थ्यास परीक्षेपासून वंचित रहावे लागले. त्या अनुषंगाने महाविद्यालये / प्राचार्य / संचालक, प्राध्यापक, विभागप्रमुख, महाविद्यालयीन परीक्षा अधिकारी, परीक्षा सहायक कर्मचारी, विद्यार्थी व पालक यांना आवाहन करण्यात येते की, विहित मुदतीत अचूक परीक्षा अर्ज भरून, तपासून कायम करणे आणि परीक्षा शुल्कही विहित कालावधीतच ऑनलाईन स्वरूपात भरणे; तसेच कोणताही पात्र विद्यार्थी / पाल्य परीक्षेपासून वंचित राहणार नाही, याची दक्षता घ्यावी.