एचपीसीएलमध्ये ३५८ ग्रॅज्युएट अॅप्रेंटिस पदांची भरती; इंजिनीअरिंग उमेदवारांसाठी सुवर्णसंधी

एज्युवार्ता न्यूज नेटवर्क 

हिंदुस्थान पेट्रोलियम कॉर्पोरेशन लिमिटेडने (HPCL)  देशभरातील विविध ठिकाणी ग्रॅज्युएट अॅप्रेंटिस इंजिनीअरिंग (Graduate Apprentice Engineering) पदांसाठी ३५८ रिक्त जागांची भरती जाहीर (Recruitment Announced) केली आहे. पेट्रोलियम आणि नैसर्गिक वायू मंत्रालयांतर्गत (Ministry of Petroleum and Natural Gas) येणाऱ्या या महारत्न कंपनीच्या मार्केटिंग विभागात सिव्हील, मेकॅनिकल, इलेक्ट्रिकल आणि इन्स्ट्रुमेंटेशन या शाखेतील पदांचा समावेश आहे. अॅप्रेंटिसेस अॅक्ट १९६१ अंतर्गत ही प्रशिक्षण भरती करण्यात येत असून, महाराष्ट्रात ६४, गुजरात ३२, तामिळनाडू २०, तेलंगणा १९ अशा राज्यनिहाय जागा उपलब्ध आहेत. अर्ज प्रक्रिया सुरू झाली असून अर्जाची अंतिम मुदत ३१ जुलै २०२६ (Application deadline July 31) पर्यंत देण्यात आली आहे. 

पात्रता आणि वयोमर्यादा

उमेदवारांना १ सप्टेंबर २०२३ किंवा त्यानंतर बी.ई./बी.टेक पूर्ण केलेले असावे. सामान्य आणि ओबीसी उमेदवारांसाठी किमान ६० टक्के तर SC/ST आणि दिव्यांग उमेदवारांसाठी ५० टक्के गुण आवश्यक आहेत. ३१ जुलै २०२६ रोजी उमेदवाराचे वय १८ ते २५ वर्षे असावे. आरक्षित वर्गांसाठी वयोमर्यादेत सूट देण्यात आली आहे. CGPA/GPA असल्यास ते युनिव्हर्सिटी निकषानुसार टक्केवारीत रूपांतरित करणे अनिवार्य आहे.

निवड प्रक्रिया

पात्र उमेदवारांच्या शैक्षणिक गुणवत्तेनुसार १:५ प्रमाणात उमेदवारांना कागदपत्र पडताळणीसाठी शॉर्टलिस्ट केले जाईल. शॉर्टलिस्टेड उमेदवारांना ई-मेलद्वारे कळवले जाईल. पडताळणीनंतर गुणवत्तेनुसार अंतिम यादी तयार होईल. निवड झालेल्या उमेदवारांना मेडिकल फिटनेस आणि पोलीस व्हेरिफिकेशन पूर्ण केल्यानंतर अॅप्रेंटिसशिपसाठी नियुक्ती दिली जाईल. प्रशिक्षण कालावधी एक वर्ष असेल.

एचपीसीएलमध्ये अॅप्रेंटिसशिप पूर्ण केलेल्या उमेदवारांना भविष्यातील नियमित भरतीत १ वर्ष वयोमर्यादा सूट आणि CBT परीक्षेत ५% गुण बोनस मिळेल. ही भरती सरकारी क्षेत्रात स्थिर करिअर घडवू इच्छिणाऱ्या इंजिनीअरिंग पदवीधरांसाठी चांगली संधी आहे. इच्छुक उमेदवारांनी HPCL च्या अधिकृत वेबसाइट https://www.hindustanpetroleum.com/ वर तपशील तपासून लवकरात लवकर अर्ज करावा, असे आवाहन करण्यात आले आहे.