11 Admission: पहिल्याच दिवशी 'रेकार्ड ब्रेक' नोंदणी; विद्यार्थ्यांनो तात्काळ आपला प्रवेश निश्चित करा..
अकरावी प्रवेश प्रक्रियेसाठी राज्यातील नोंदणीकृत महाविद्यालयांची संख्या ९ हजार ३३९ असून ‘CAP’ अंतर्गत १८ लाख ७५ हजार ९७ जागा उपलब्ध आहेत. शासकीय कोट्यातली २ लाख ३ हजार ३७३ जागा उपलब्ध आहेत. त्यामुळे या शैक्षणिक वर्षात दोन्ही मिळून २० लाख ८८ हजार ४७० विद्यार्थी प्रवेश घेणार आहेत.
eduvarta@gmail.com 
एज्युवार्ता न्यूज नेटवर्क
दहावीच्या निकालानंतर राज्यातील १५ ते १६ लाख विद्यार्थ्यांना महाविद्यालयीन जीवनाचे वेध लागले आहे. अकरावी प्रवेशासाठी काही तांत्रिक अडचणी उद्भवल्याने विद्यार्थ्यांना जवळपास एक आठवडा वाट पाहावी लागली. मात्र, 'देर आए दुरुस्त आय' या म्हणी प्रमाणे उशीरा का होईना पण प्रवेश प्रक्रियेला आता वेग आला आहे. शैक्षणिक वर्ष २०२५-२६ (Academic year 2025-26) साठी सोमवार २६ मे रोजी सकाळी दहा वाजता अकरावी प्रवेश प्रक्रियेसाठी (11th admission process) ऑनलाईन नोंदणीला सुरुवात करण्यात आली. पहिल्याच दिवशी 'रेकाॅर्ड ब्रेक' नोंदणी करण्यात आली आहे. राज्यातील तब्बल ३ लाख २७ हजार ८४२ विद्यार्थ्यांनी आपली नोंदणी (3 lakh 27 thousand 842 students registered for admission) प्रक्रिया पूर्ण केल्याची माहिती संकेतस्थळावर प्रसिद्ध करण्यात आली आहे. त्यामुळे अद्याप नोंदणी न केलेल्या विद्यार्थ्यांनी तात्काळ आपली नोंदणी करणे आवश्यक आहे.
अकरावी प्रवेश प्रक्रियेसाठी राज्यातील नोंदणीकृत महाविद्यालयांची संख्या ९ हजार ३३९ असून ‘CAP’ अंतर्गत १८ लाख ७५ हजार ९७ जागा उपलब्ध आहेत. शासकीय कोट्यातली २ लाख ३ हजार ३७३ जागा उपलब्ध आहेत. त्यामुळे या शैक्षणिक वर्षात दोन्ही मिळून २० लाख ८८ हजार ४७० विद्यार्थी प्रवेश घेणार आहेत. विद्यार्थ्यांना त्यांच्या पसंतीनुसार कमाल १० उच्च माध्यमिक विद्यालये निवडण्याची सुविधा पोर्टलवर उपलब्ध आहे. यासाठी ऑनलाईन पद्धतीने प्रवेश अर्ज सादर करावा लागणार असून अर्जात नमूद केलेल्या प्राधान्यक्रमानुसार, आराखडा आणि गुणवत्ता गुणांच्या आधारे प्रवेश प्रक्रिया राबविण्यात येणार असल्याची माहिती शिक्षण विभागाकडून देण्यात आली आहे.
विद्यार्थ्यांसाठी महत्त्वाच्या सूचना -
व्यवस्थापन कोटा, संस्था अंतर्गत कोटा व अल्पसंख्याक कोट्यातून मिळालेल्या प्रवेशाच्या रद्द करण्यासंदर्भातील कार्यपद्धती विद्यार्थ्यांनी नीट समजून घ्यावी. प्रत्येक प्रवेश फेरीत विद्यार्थ्यांनी संमती अनिवार्यपणे नोंदवणे आवश्यक आहे. ज्यांना प्रथम फेरीत प्रवेश मिळणार नाही अशा विद्यार्थ्यांना पुढील फेऱ्यांमध्ये सहभागी होण्याची संधी असेल. ५ जून २०२५ रोजी तात्पुरती सर्वसाधारण प्रवेश यादी जाहीर करण्यात येणार आहे.
मार्गदर्शन व सहाय्यता -
विद्यार्थ्यांना फॉर्म भरताना मदत मिळावी, तसेच महाविद्यालयांकडून प्रवेश प्रक्रियेत आवश्यक कागदपत्रांची तपासणी योग्यरित्या व्हावी यासाठी विभागीय शिक्षण उपसंचालक कार्यालयामार्फत प्रशिक्षण कार्यक्रम आयोजित करण्यात येणार आहे. प्रवेश प्रक्रियेची संपूर्ण माहिती माहिती पुस्तिकेत व ऑनलाईन पोर्टलवर उपलब्ध आहे. प्रवेश प्रक्रियेदरम्यान उद्भवणाऱ्या अडचणींच्या सोडवणुकीसाठी प्रत्येक विभागीय, जिल्हा व तालुका स्तरावर मार्गदर्शन व मदत केंद्रे स्थापन करण्यात आली आहेत.
तांत्रिक अडचण किंवा इतर मार्गदर्शनासाठी विद्यार्थ्यांनी व पालकांनी सहाय्यता क्रमांकः ८५३०९५५५६४ वर अथवा ई-मेल : support@mahafyjcadmissions.in वर संपर्क साधावा, असे आवाहन डॉ.पालकर यांनी केले आहे.
