मुक्त विद्यापीठ : पुढे ढकलण्यात आलेल्या पेपरच्या परीक्षा २२, २३, २४ आणि २५ जानेवारीला होणार 

एज्युवार्ता न्यूज नेटवर्क 

यशवंतराव चव्हाण महाराष्ट्र मुक्त विद्यापीठाच्या (Yashwantrao Chavan Maharashtra Open University) विविध विद्याशाखांतील हिवाळी परीक्षांना आजपासून सुरुवात होत आहे. मात्र, याच काळात होणारी महाराष्ट्र लोकसेवा आयोगाची परीक्षा आणि महापालिका निवडणुका आल्याने विद्यापीठाने ११, १४, १५ व १६ जानेवारी रोजी होणारे पेपर पुढे ढकलले होते. मात्र, आता पुढे ढकलण्यात आलेल्या पेपरच्या तारखा जाहीर (Exam dates announced) करण्यात आल्या आहेत.  ११, १४, १५ व १६ जानेवारी रोजी होणारे पेपर आता अनुक्रमे  २२, २३, २४ आणि २५ जानेवारी रोजी (The exams will be held on January 22, 23, 24 and 25) आयोजित करण्यात येणार आहेत. विद्यापीठाने त्याबाबत नवीन तारखा जाहीर केल्या आहेत. 

हेही वाचा - महापालिका क्षेत्रातील शासकीय कार्यालयांना १५ जानेवारीला सार्वजनिक सुट्टी

मुक्त विद्यापीठात शिक्षण घेणारे विद्यार्थी नोकरदार, व्यावसायिक, पोलीस, सैनिक, गृहिणी, शिक्षक, कामगार अशा समाजातील विविध घटकांतील असून या परीक्षेमध्ये विविध विषयाच्या ६ लाख ७९ हजार ९५४ उत्तरपत्रिका लिहिल्या जाणार आहेत. परीक्षा सुरळीत व पारदर्शकपणे होण्यासाठी विद्यापीठाने भरारी पथकांची नियुक्ती केली आहे. 

हिवाळी परीक्षांसाठी राज्यातील २६९ परीक्षा केंद्रांवर तयारी केली आहे. परीक्षेसाठी एकूण १ लाख ४९ हजार ८७२ विद्यार्थ्यांनी नोंदणी केली असून, संपूर्ण परीक्षा प्रक्रिया ३१ जानेवारीपर्यंत सुरू राहणार आहे. महाराष्ट्र लोकसेवा आयोगाची वर्ग क ची परीक्षा ११ जानेवारी रोजी होणार आहे. तसेच, राज्यातील २९ महापालिका निवडणुकांसाठी १५ जानेवारीला होणारे मतदान आणि १६ जानेवारीची मतमोजणी यामुळे अनेक विद्यार्थी आणि प्रशासकीय यंत्रणा त्यात व्यस्त असणार आहे. यामुळे परीक्षा वेळापत्रकात बदल करण्यात आला होता.