मुंबई महापालिका अभियंता भरती: 690 जागांच्या भरतीला नव्याने सुरूवात 

 
एज्युवार्ता न्यूज नेटवर्क 

बृहन्मुंबई महानगरपालिके अंतर्गत अभियंता (BMC Engineer Recruitment Process) पदांच्या 690 जागांसाठी नवीन भरती प्रक्रिया (A new start to recruitment) राबवण्यात येत आहे. त्यासाठी नुकतीच जाहिरात प्रसिद्ध करण्यात आली असून या भरती मोहिमेअंतर्गत कनिष्ठ अभियंता (स्थापत्य), कनिष्ठ अभियंता (मेकॅनिकल आणि इलेक्ट्रिकल), दुय्यम अभियंता (स्थापत्य), दुय्यम अभियंता (यांत्रिकी आणि विद्युत) पदांच्या एकूण 690 रिक्त जागा भरण्यासाठी पदांनुसार पात्र असणाऱ्या उमेदवारांकडून अर्ज मागविण्यात येत आहे. अर्ज ऑनलाईन पद्धतीने करायचा असून उमेदवार मुंबई महापालिकेचे अधिकृत संकेतस्थळ https://ibpsonline.ibps.in/bmcjeapr23/ वर जाऊन अर्ज करू शकतात. अर्ज करण्याची अंतिम मुदत 16 डिसेंबर 2024 आहे. 

मुंबई पालिका प्रशासनाने मागील महिन्यात जाहिरात प्रसिद्ध केली. मात्र, अवघ्या काही दिवसांत राज्यात विधानसभा निवडणूकीची आचारसंहिता लागू करण्यात आली. त्यामुळे पालिका प्रशासनावर ही भरती प्रक्रिया पुढे ढकलण्याची नामुष्की ओढावली. त्यामुळे आता नवीन जाहिरात प्रसिद्ध करण्यात आली असून त्यानुसार उमेदवारांकडून अर्ज मागवण्यात येत आहेत. 

गट -'क' मध्ये येणाऱ्या कनिष्ठ अभियंता (स्थापत्य) आणि कनिष्ठ अभियंता (यांत्रिकी व विद्युत) या पदाच्या एकूण अनुक्रमे २५० आणि १३० जाग भरल्या जाणार आहेत. तर गट - 'ब' मध्ये येणाऱ्या दुय्यम अभियंता (स्थापत्य) आणि दुय्यम अभियंता (यांत्रिकी व विद्युत) पदांच्या अनुक्रमे २३३ आणि ७७ जागा भरल्या जाणार आहेत. जाहिरातीमध्ये बिंदू नियमावली तयार करण्यात आली असून, वेगवेगळ्या प्रवर्गासाठी जागांचे विभाजन करण्यात आले आहे. 
    
शैक्षणिक पात्रता 

कनिष्ठ अभियंता स्थापत्य या पदासाठी अर्ज करणाऱ्या उमेदवाराने दहावी उत्तीर्ण झाल्यानंतर तीन वर्षांची स्थापत्य, कंस्ट्रक्शन टेक्नोलॉजी,पब्लिक हेल्थ इंजिनिअरिंगमधील पदविका उत्तीर्ण असणे आवश्यक आहे. दहावीच्या परीक्षेत मराठी विषय घेऊन उत्तीर्ण झालेले असणे आवश्यक आहे. याशिवाय MS-CIT किंवा समकक्ष परीक्षा उत्तीर्ण असणे आवश्यक आहे. कनिष्ठ अभियंता(यांत्रिकी व विद्युत पदासाठी उमेदवार 10वी उत्तीर्ण  झाल्यानंतर यांत्रिकी विद्युत/ऑटोमोबाइल/इलेक्ट्रॉनिक्स/प्रोडक्शन/इलेक्ट्रिकल पॉवर सिस्टम/इंडस्ट्रियल इलेक्ट्रॉनिक्स/इंस्ट्रुमेंटेशन/इलेक्ट्रॉनिक्स & कम्युनिकेशन इंजिनिअरिंग डिप्लोमा  उत्तीर्ण असणे आवश्यक आहे. तसेच दहावीच्या परीक्षेत मराठी विषय घेऊन उत्तीर्ण झालेले असणे आवश्यक आहे. याशिवाय MS-CIT किंवा समकक्ष परीक्षा उत्तीर्ण असणे आवश्यक आहे. दुय्यम अभियंता (स्थापत्य) पदासाठी अर्ज केलेला उमेदवारा सिव्हिल इंजिनिअरिंगची पदवी तसेच MS-CIT किंवा समकक्ष परीक्षा उत्तीर्ण असणे आवश्यक आहे. तर दुय्यम अभियंता (यांत्रिकी व विद्युत) पदासाठी अर्ज करणारा उमेदवार यांत्रिकी व विद्युत किंवा ऑटोमोबाइल/ इलेक्ट्रॉनिक्स/ प्रोडक्शन/ इलेक्ट्रॉनिक्स & पॉवर इंजिनिअरिंग पदवी  उत्तीर्ण असणे आवश्यक आहे तसेच MS-CIT किंवा समतुल्य परीक्षा उत्तीर्ण असणे आवश्यक आहे. 

भरती प्रक्रियेसाठी अर्ज करणाऱ्या उमेदवाराचे वय 25 नोव्हेंबर 2024 रोजी 18 ते 38 वर्षे या दरम्यान असणे आवश्यक आहे. तर मागासवर्गीय उमेदवारांना 5 वर्षे तर ओबीसी उमेदवारांना 3 वर्ष सूट देण्यात आली आहे. सदर भरती प्रक्रियेत सहभागी होण्यासाठी खुला प्रवर्गातील उमेदवारांकडून 1 हजार रुपये, तर मागासवर्गीय प्रवर्गातील उमेदवारांकडून 900 रुपये अर्ज शुल्क आकारण्यात येणार आहे. अधिक आणि सविस्तर माहितीसाठी उमेदवारांनी मुंबई महापालिकेच्या अधिकृत संकेतस्थळाला भेट द्यावी.