मंत्रिमंडळाचा ऐतिहासिक निर्णय, मुंबईतील 'ही' ६ नामांकित महाविद्यालये क्लस्टर युनिव्हर्सिटीला संलग्न

एज्युवार्ता न्यूज नेटवर्क 

मुख्यमंत्री देवेंद्र फडणवीस (CM Devendra Fadanvis) यांच्या अध्यक्षतेखाली आज मंगळवार, २ जून २०२६ रोजी पार पडलेल्या मंत्रिमंडळाच्या बैठकीत उच्च शिक्षण क्षेत्राला चालना देणारा महत्त्वपूर्ण निर्णय (important decision) घेण्यात आला. हैद्राबाद (सिंध) नॅशनल कॉलेजिएट विद्यापीठ (एचएसएनसी युनिव्हर्सिटी), मुंबई या समूह विद्यापीठामध्ये सहा नामांकित महाविद्यालयांचा (6 Renowned Colleges) घटक महाविद्यालये म्हणून समावेश करण्यास मंत्रिमंडळाने मान्यता (Cabinet Approval) दिली. यामुळे मुंबईतील उच्च शिक्षण व्यवस्थेला नवी दिशा मिळणार असून, विद्यार्थ्यांना गुणवत्तापूर्ण शिक्षण, संशोधन आणि कौशल्य विकासाच्या संधी वाढतील, असा विश्वास व्यक्त करण्यात आला आहे.

या महाविद्यालयांमध्ये प्राचार्य के. एम. कुंदनानी औषधनिर्माणशास्त्र महाविद्यालय, किशनचंद चेलाराम विधि महाविद्यालय, श्रीमती मिठीबाई मोतीराम कुंदनानी वाणिज्य व अर्थशास्त्र महाविद्यालय, ऋषी दयाराम आणि सेठ हसराम नॅशनल व सेठ वासियामुल्ल असोमुल्ल विज्ञान महाविद्यालय, थडोमल शाहनी अभियांत्रिकी महाविद्यालय यांचा समावेश आहे.

एचएसएनसी विद्यापीठ ही महाराष्ट्रातील दुसरी क्लस्टर युनिव्हर्सिटी आहे. हैद्राबाद (सिंध) नॅशनल कॉलेजिएट बोर्ड (एचएसएनसीबी) ही संस्था १९२१ पासून शिक्षण क्षेत्रात कार्यरत आहे. मुंबईत १४ हून अधिक महाविद्यालये, शाळा आणि संस्था चालवणारी ही सिंधी अल्पसंख्याक संस्था गुणवत्तापूर्ण शिक्षणासाठी प्रसिद्ध आहे. या निर्णयामुळे या महाविद्यालयांना स्वायत्तता, नवीन अभ्यासक्रम राबवण्याची संधी, आंतरराष्ट्रीय सहकार्य आणि संशोधनासाठी अधिक निधी उपलब्ध होईल. विद्यार्थ्यांना आधुनिक सुविधा, उद्योग-संस्था भागीदारी आणि रोजगाराभिमुख शिक्षण मिळेल, असा शासनाचा उद्देश आहे.

एचएसएनसी विद्यापीठ आधीच एच. आर. कॉलेज, के. सी. कॉलेज आणि बॉम्बे टीचर्स ट्रेनिंग कॉलेजसारख्या नामवंत संस्थांचा समावेश असलेले क्लस्टर म्हणून कार्यरत आहे. नवीन महाविद्यालयांच्या समावेशाने विद्यापीठाचा विस्तार होऊन ते राज्यातील एक प्रमुख शैक्षणिक केंद्र बनण्याची शक्यता आहे. यामुळे राज्यातील शिक्षण आणि पायाभूत सुविधा विकासाला एकत्रित चालना मिळेल.

नवीन घटक महाविद्यालयांना आवश्यक प्रशासकीय आणि शैक्षणिक सुधारणा करण्यासाठी मार्गदर्शन दिले जाईल. या निर्णयाचे स्वागत करताना एचएसएनसी बोर्डने यामुळे विद्यार्थ्यांच्या भविष्यासाठी अधिक चांगल्या संधी निर्माण होणार असल्याचे म्हटले आहे.हा निर्णय महाराष्ट्रातील उच्च शिक्षण क्षेत्रातील एक मैलाचा दगड ठरेल. तो गुणवत्ता, समावेशकता आणि उद्योग-शिक्षण समन्वय वाढवण्याच्या दिशेने महत्त्वाचा पाऊल असल्याचे सांगण्यात आले आहे.