पालकांना मोठा दिलासा! RTE प्रवेशासाठी ३० एप्रिलपर्यंत मुदतवाढ
शिक्षण विभागाच्या या निर्णयामुळे ग्रामीण तसेच शहरी भागातील अनेक पालकांना दिलासा मिळाला आहे. विशेषतः जे पालक शेवटच्या टप्प्यात अर्ज करण्याच्या तयारीत होते, त्यांना आता आवश्यक कागदपत्रे पूर्ण करून अर्ज सादर करण्यासाठी अधिक वेळ मिळणार आहे.
eduvarta@gmail.com 
एज्युवार्ता न्यूज नेटवर्क
आरटीई प्रवेश प्रक्रियेत (RTE Admission Process) सहभागी होणाऱ्या पालकांसाठी मोठा दिलासा देणारा निर्णय घेण्यात आला आहे. शिक्षण हक्क कायद्याअंतर्गत प्रवेश अर्ज करण्याची मुदत आता ३० एप्रिलपर्यंत वाढवण्यात (Extension until April 30) आली आहे. यामुळे अद्याप अर्ज न करू शकलेल्या पालकांना आणखी संधी मिळणार आहे. प्राथमिक शिक्षण संचालक शरद गोसावी (Sharad Gosavi) यांनी प्रसिद्धिपत्रकाद्वारे (press release) ही माहिती दिली.
दरवर्षीप्रमाणे आरटीई अंतर्गत खाजगी शाळांमध्ये २५ टक्के जागा आर्थिकदृष्ट्या दुर्बल व वंचित घटकांतील विद्यार्थ्यांसाठी राखीव असतात. या जागांसाठी ऑनलाइन पद्धतीने अर्ज प्रक्रिया राबवली जाते. यंदा अर्ज प्रक्रियेदरम्यान अनेक पालकांना तांत्रिक अडचणी, कागदपत्रे अपलोड करण्यातील समस्या तसेच वेळेअभावी अर्ज पूर्ण करता आला नव्हता. या पार्श्वभूमीवर शिक्षण विभागाने मुदतवाढ देण्याचा निर्णय घेतला आहे.
शिक्षण विभागाच्या या निर्णयामुळे ग्रामीण तसेच शहरी भागातील अनेक पालकांना दिलासा मिळाला आहे. विशेषतः जे पालक शेवटच्या टप्प्यात अर्ज करण्याच्या तयारीत होते, त्यांना आता आवश्यक कागदपत्रे पूर्ण करून अर्ज सादर करण्यासाठी अधिक वेळ मिळणार आहे. आतापर्यंत ४० हजार १३८ विद्यार्थ्यांचे प्रवेश निश्चित करण्यात आले आहेत.
प्राथमिक शिक्षण संचालनालयातर्फे शैक्षणिक वर्ष २०२६-२७ साठीची आरटीई प्रवेश प्रक्रिया राबवण्यात येत आहे. यंदा राज्यातील ८ हजार ७०१ शाळांमध्ये १ लाख १४ हजार ८२६ जागा प्रवेशासाठी उपलब्ध झाल्या आहेत. त्यासाठी २ लाख ८९ हजार २८६ अर्ज दाखल असून १ लाख ५ हजार ८११ विद्यार्थ्यांची लाॅटरीद्वारे निवड करण्यात आली आहे. यापूर्वीची देण्यात आलेली मुदत संपुष्टात आल्यानंतर आता ३० एप्रिलपर्यंत मुदतवाढ देण्यात आली आहे.
