जेईई मेन्स परीक्षेत महाराष्ट्राचा डंका; मुंबईचा माधव आणि पुण्याचा सिद्धार्थ याला १०० पर्सेंटाइल

एज्युवार्ता न्यूज नेटवर्क

देशातील सर्वात प्रतिष्ठित अभियांत्रिकी प्रवेश परीक्षांपैकी एक असलेल्या जेईई मेन्स २०२६ (JEE Mains 2026) (सत्र -२) चा निकाल जाहीर (Results Announced) झाला असून, यामध्ये महाराष्ट्राने उल्लेखनीय कामगिरी करत आपला ठसा उमटवला आहे. देशभरातील अव्वल विद्यार्थ्यांच्या यादीत महाराष्ट्रातील दोन विद्यार्थ्यांनी (2 Students Top the List) स्थान मिळवले असून, त्यांनी १०० पर्सेटाइल (100 percentile) मिळवत राज्याचे नाव उज्ज्वल केले आहे. या यशस्वी विद्यार्थ्यांमध्ये मुंबईतील माधव विराडिया आणि पुणे येथील सिद्धार्थ अथळे (Madhav Viradia, Siddharth Athale) यांचा समावेश आहे. 

राज्यातील या दोन्ही विद्यार्थ्यांनी जेईई मेन्स २०२६  परीक्षेत १०० पर्सेंटाइल मिळवत देशातील टॉप 26 विद्यार्थ्यांमध्ये स्थान मिळवले आहे. त्यांच्या या यशामुळे महाराष्ट्रातील विद्यार्थ्यांना प्रोत्साहन मिळाले आहे. तसेच शिक्षण क्षेत्रातही समाधान व्यक्त करण्यात येत आहे. 

राष्ट्रीय पातळीवर जेईई मेन्स २०२६ मध्ये एकूण 26 विद्यार्थ्यांनी १०० पर्सेटाइल मिळवले आहेत. या यादीत विविध राज्यांतील विद्यार्थ्यांचा समावेश आहे. मात्र, महाराष्ट्रातील दोन विद्यार्थ्यांनी या यादीत स्थान मिळवणे ही राज्यासाठी अभिमानाची बाब मानली जात आहे.

विशेष म्हणजे, जेईई मेन्स ही परीक्षा अत्यंत स्पर्धात्मक मानली जाते. लाखो विद्यार्थी दरवर्षी या परीक्षेला बसतात आणि त्यामध्ये १०० पर्सेटाइल मिळवणे हे अत्यंत कठीण मानले जाते. अशा परिस्थितीत महाराष्ट्रातील विद्यार्थ्यांनी मिळवलेले यश विशेष ठरते.

दरम्यान, या निकालानंतर आता विद्यार्थ्यांचे लक्ष जेईई ॲडव्हान्स परीक्षेकडे लागले आहे. जेईई मेन्स मध्ये उत्कृष्ट गुण मिळवणारे विद्यार्थी जेईई ॲडव्हान्स साठी पात्र ठरणार असून, त्याद्वारे देशातील आयआयटींसारख्या प्रतिष्ठित संस्थांमध्ये प्रवेश मिळवण्याची संधी मिळणार आहे.