अतिरिक्त शुल्क आकारणाऱ्या महाविद्यालयांना 'एफआरए'चा इशारा; "...अर्थ लावून कारवाई करणार"
या वर्षी प्रथम वर्षाला प्रवेश घेणाऱ्या विद्यार्थ्यांनी केवळ एका वर्षाचे शुल्क महाविद्यालयांमध्ये भरावे. त्यापेक्षा अधिक शुल्काची मागणी महाविद्यालयांनी केल्यास त्याची पुराव्यासह एफआरएकडे तक्रार करावी, असे आवाहन एफआरएने केले आहे.
eduvarta@gmail.com 
एज्युवार्ता न्यूज नेटवर्क
राज्यातील वैद्यकीय, उच्च व तंत्र शिक्षण, कृषी विभागांतर्गत (Medical, Higher and Technical Education, Agriculture Department) येणाऱ्या महाविद्यालयांनी विद्यार्थ्यांकडून एका वर्षात निश्चित केलेल्या शुल्कापेक्षा अधिक शुल्क घेऊ नये. अन्यथा हे अतिरिक्त शुल्क कॅपिटेशन फी (Additional charge Capitation fee) असल्याचा अर्थ लावून महाविद्यालयांवर कारवाई करण्यात येईल, असा इशारा शुल्क नियामक प्राधिकरणाने (एफआरए) महाविद्यालयांना दिला आहे. विविध घटकांच्या नावाखाली, तसेच पुढील वर्षाच्या शुल्काचीही महाविद्यालयांकडून मागणी केली जात असल्याचा पार्श्वभूमीवर एफआरएने हा इशारा दिला आहे.
या वर्षी प्रथम वर्षाला प्रवेश घेणाऱ्या विद्यार्थ्यांनी केवळ एका वर्षाचे शुल्क महाविद्यालयांमध्ये भरावे. त्यापेक्षा अधिक शुल्काची मागणी महाविद्यालयांनी केल्यास त्याची पुराव्यासह एफआरएकडे तक्रार करावी, असे आवाहन एफआरएने केले आहे. एफआरएने अभ्यासक्रमनिहाय किती अनामत रक्कम आकारावी याची नियमावली महाविद्यालयांना ठरवून दिली आहे. त्यानुसारच महाविद्यालयांनी अनामत रक्कम आकारावी. तसेच विद्यार्थ्यांचा अभ्यासक्रम पूर्ण झाल्यावर अनामत रक्कम माघारी देण्याची सर्वस्वी जबाबदारी संबंधित शिक्षण संस्थेची राहील, असेही एफआरएने स्पष्ट केले आहे.
एफआरएने त्यांच्या अंतर्गत येणाऱ्या व्यावसायिक अभ्यासक्रमांच्या खासगी विनाअनुदानित व्यावसायिक शिक्षण संस्थांना २०२५-२६ या शैक्षणिक वर्षासाठी किती शुल्क आकारावे याची मर्यादा घालून दिली आहे. मात्र, ही मर्यादा घालून दिली असली तरी काही महाविद्यालये विद्यार्थ्यांकडून अतिरिक्त शुल्क आकारतात. यातून विद्यार्थ्यांची लूट होते. त्या पार्श्वभूमीवर एफआरएने निर्धारित केलेल्या एका वर्षाच्या शुल्कापेक्षा अधिक शुल्काची आकारणी विद्यार्थ्यांकडून केल्यास हे अतिरिक्त शुल्क कॅपिटेशन फी म्हणून पकडले जाणार आहे. तसेच अशा संस्थांवर कारवाई केली जाणार आहे.
