शालेय पोषण आहाराच्या दर्जावरून शिक्षण मंत्र्यांचे अधिकाऱ्यांना आदेश

एज्युवार्ता न्यूज नेटवर्क 

विद्यार्थ्यांमध्ये गुणात्मक बदल घडवून आणतांना त्यांच्या पाठीवर दप्तरांचा बोजा वाढणार नाही, यांची दक्षता घेणे आवश्यक आहे. तसेच शालेय विद्यार्थ्यांना चांगल्या दर्जाचा पोषण आहार मिळणे गरजेचे आहे.पोषण आहारात कडधान्य,पौष्टीक तृणधान्य आदीचा समावेश करावा. शिक्षणाधिकाऱ्यांनी वारंवार शाळेला भेटी देऊन पोषण आहाराची पाहणी करावी,असे आदेश शालेय शिक्षण मंत्री दिपक केसरकर (School Education Minister Deepak Kesarkar)यांनी शिक्षण अधिकाऱ्यांना दिले. तसेच विद्यार्थ्यांना चांगले प्रशिक्षण मिळण्यासाठी शिक्षकांनाही स्काऊट व गाईडचे प्रशिक्षण देण्यात यावे.तसेच मुख्यमंत्री माझी शाळा टप्पा २ व स्वच्छता मॉनिटर टप्पा २ ची अंमलबजावणी प्रभावीपणे  करावी, असे आवाहनही त्यांनी केले. 

महाराष्ट्र राज्य माध्यमिक व उच्च माध्यमिक शिक्षण मंडळ,शिवाजीनगर येथे शालेय शिक्षण विभागाच्या आढावा बैठकीत केसरकर बोलत होते. यावेळी शालेय शिक्षण आयुक्त सूरज मांढरे, राज्य शैक्षणिक संशोधन व प्रशिक्षण परिषदेच्या सहसंचालक शोभा खंदारे,महाराष्ट्र राज्य परीक्षा परिषदेचे अध्यक्ष नंदकुमार बेडसे, महाराष्ट्र राज्य माध्यमिक व उच्च माध्यमिक शिक्षण मंडळाचे अध्यक्ष शरद गोसावी,शिक्षण संचालक महेश पालकर यांच्यासह राज्यातील विभागीय शिक्षण उपसंचालक व इतर अधिकारी ऑनलाईन पध्दतीने सहभागी झाले होते.

केसरकर म्हणाले, महिला व बालविकास विभागाकडून लहान मुलांसाठी कोणते उपक्रम राबविता येतील याची चाचपणी करावी. शिक्षकांनी विद्यार्थ्यांच्या गुणात्मक प्रगतीसाठी विशेष प्रयत्न करणे आवश्यक आहे. शिक्षण सेवा सप्ताह उत्तमरितीने राबवावा. सर्व शाळांना इंटरनेट जोडणी असावी. जेथे इंटरनेट जोडणी नसेल तेथील प्रस्ताव सादर करावा. दुर्गम भागात उपग्रह कनेक्टिव्हिटी घ्यावी. त्यामुळे शाळेत ऑनलाईन कार्यक्रम राबवणे सोपे जाईल. 

शिक्षक दिनाच्या निमित्ताने विविध स्पर्धांचे आयोजन करावे.यामध्ये महावाचन उत्सव, शिक्षण अभियान, जर्मन भाषा यासारखे व इतर आकर्षक विषय असावेत. विद्यार्थ्यांसाठीच्या सर्व योजना मोहिम स्तरावर राबवाव्यात. अधिकाऱ्यांनी शिक्षणाचा दर्जा, गणवेश, दप्तरांचा बोजा, वहीतील कोऱ्या पानांचा उपयोग, पोषण आहार, परसबाग योजना, स्काऊट आणि गाईड, शिष्यवर्ती योजना, शाळेतील स्वच्छतागृहाची स्थिती व  किचन शेडची वारंवार तपासणी करावी.शाळेत आनंददायी शनिवार राबविण्यासाठी विविध कार्यक्रमांचे आयोजन करावे,असेही केसारकर म्हणाले. 

यावेळी मांढरे यांनी मुख्यमंत्री माझी शाळा सुंदर शाळा टप्पा २, स्वच्छता मॉनिटर टप्पा २, महावाचन अभियान टप्पा २, परसबाग योजना, शिक्षण सेवा सप्ताह, पवित्र पोर्टल, केंद्रप्रमुख भरती, स्वयंअर्थसहाय्यित नवीन शाळांच्या मान्यतेबाबत बृहतआराखडा सद्यस्थिती या विषयांची माहिती दिली. 
----------------------------------------