बारावीच्या विद्यार्थ्यांसाठी मोठी बातमी; हॉल तिकीट उपलब्ध 

एज्युवार्ता न्यूज नेटवर्क 

महाराष्ट्र राज्य माध्यमिक व उच्च माध्यमिक शिक्षण मंडळातर्फे फेब्रुवारी- मार्च 2026 मध्ये घेतल्या जाणाऱ्या इयत्ता बारावीच्या परीक्षांना प्रविष्ट झालेल्या विद्यार्थ्यांचे हॉल तिकीट ऑनलाईन पद्धतीने उपलब्ध करून देण्यात आले आहेत. येत्या सोमवारी 12 जानेवारीपासून हॉल तिकीट डाऊनलोड करून घेता येणार आहेत. सर्व संबंधित शाळा व कनिष्ठ महाविद्यालयांनी विद्यार्थ्यांना हॉल तिकिटाच्या प्रिंट आऊट काढून द्याव्यात, अशा सूचना राज्य मंडळातर्फे देण्यात आले आहेत. 

इयत्ता बारावीच्या परीक्षेला काही दिवसच उरले आहेत. विद्यार्थ्यांच्या तोंडी परीक्षा व लेखी परीक्षा जवळ आल्या आहेत. त्यामुळे राज्य मंडळाने सर्व विभागीय मंडळांना विद्यार्थ्यांच्या हॉल तिकिटाच्या प्रिंट आऊट उपलब्ध करून दिल्या आहेत. विद्यार्थ्यांना हॉल तिकीट देताना शाळा व महाविद्यालयांनी कोणतेही वेगळे शुल्क घेऊ नये. हॉल तिकिटावर प्रिंटआऊट काढून त्यावर मुख्याध्यापक प्राचार्य यांनी शिक्का व स्वाक्षरी करावी. 

हॉल तिकिटावर नाव, आईचे नाव, जन्मतारीख व इतर दुरुस्त्या असल्यास या दुरुस्त्या ऑनलाईन पद्धतीनेच करावयाच्या आहेत. त्यासाठी ऍप्लीकेशन करेक्शन ही लिंक उपलब्ध करून देण्यात आली आहे. दिलेल्या मुदतीत शुल्क भरून दुरुस्त्या विभागीय मंडळाकडे मान्यतेसाठी पाठवायचे आहेत. करेक्शन ऍडमिट कार्ड या लिंक द्वारे सुधारित ऍडमिट कार्ड उपलब्ध होतील. विषय, माध्यम बदल असल्यास प्रचलित पद्धतीनुसार विभागीय मंडळात प्रत्यक्ष संपर्क साधून योग्य त्या दुरुस्त्या कराव्यात.

विद्यार्थ्यांच्या हॉल तिकिटावरील फोटो सदोष असल्यास त्यावर विद्यार्थ्यांचा फोटो चिटकवून त्यावर संबंधित मुख्याध्यापक/ प्राचार्य यांनी शिक्का मारून स्वाक्षरी करायची आहे. एखाद्या विद्यार्थ्याचे हॉल तिकीट गहाळ झाल्यास संबंधित शाळा व कनिष्ठ महाविद्यालयांनी पुन्हा प्रिंट आऊट काढून त्यावर लाल शाईने द्वितीय प्रत असा शेरा देऊन विद्यार्थ्यांना हॉल तिकीट द्यायचे आहे, अशा सूचना राज्य मंडळाचे सचिव डॉ. दीपक माळी यांनी दिल्या आहेत.