नांदेडमध्ये बदलापूर प्रकरणाची पुनरावृत्ती; कर्मचाऱ्याकडून १० वर्षाच्या मुलाचा लैंगिक छळ

एज्युवार्ता न्यूज नेटवर्क 

राज्यातील शाळांमध्ये चिमूकल्यांवर होणाऱ्या आत्याचाराच्या (Torture case) घटना काही केल्या थांबायचे नाव घेताना दिसत नाही. ज्या बदलापूर प्रकरणामुळे संपूर्ण राज्य हादरले होते, त्याच बदलापूर प्रकरणाची पुनरावृत्ती नांदेड जिल्ह्यात (Nanded Crime News) घडल्याचा धक्कादायक प्रकार समोर आला आहे. या प्रकरणामुळे पुन्हा एकदा राज्याच्या कायदा व सुव्यवस्थेचे धिंदवडे उडाले आहेत. शाळेतील सेवकाने एका १० वर्षाच्या मुलाचा लैंगिक छळ (Sexual harassment of a 10-year-old boy) केल्याचे पालकांनी दाखल केलेल्या तक्रारीत म्हटले आहे. 

नांदेडमध्ये संतापजनक आणि मन हेलावून टाकणारी घटना घडली आहे. शहरात असलेल्या एका नामवंत शाळेतील सेवकाने चौथीत शिकत असणाऱ्या विद्यार्थ्यांचा लैंगिक छळ केल्याचे समोर आले आहे. गुरुवारी दुपारी हा प्रकार घडला असून या घटनेने एकच खळबळ उडाली आहे. शाळेत सेवक पदावर कार्यरत असणारा ५० वर्षीय आरोपी साबसिंघ मुन्नालाल मच्छल याने दहा वर्षाच्या विद्यार्थ्याचा लैंगिक छळ केला असल्याचे उघड झाले आहे. 

विद्यार्थी शाळेच्या मैदानावर क्रिकेट खेळत होता.खेळून झाल्यानंतर क्रिकेटची कीट स्टोर रूममध्ये ठेवण्यासाठी गेला असता सेवकाने त्याच्यासोबत दुष्कृत्य केले. पिडीत विद्यार्थ्यांने घडलेला प्रकार आपल्या पालकांना सांगितला यानंतर संतापलेल्या आई वडिलांनी थेट विमानतळ पोलीस स्टेशन गाठले आणि सेवकविरोधात तक्रार दाखल केली आहे. तर पोलिसांनी आरोपीला ताब्यात घेतले असून त्याच्यावर पोक्सो कायद्याअंतर्गत गुन्हा दाखल करण्यात आला आहे.