'त्या' शिक्षिकेला एका दिवसात कसा मिळाला शालार्थ आयडी
शालार्थ आयडीसाठी 1 लाख रुपयांची लाच घेतलेल्या रावसाहेब मिरगणे या अधिकाऱ्यांच्या कार्यालयात आणखी १ लाख २० हजार रुपये आढळून आले होते. हे कोणत्याही शासकीय कामाव्यतिरिक्त होते. पोलिसांनी ही रक्कम सुध्दा जप्त केली होती.
eduvarta@gmail.com 
एज्युवार्ता न्यूज नेटवर्क
राज्यात शालार्थ आयडी (shalarth ID)घोटाला गाजत असताना पुण्यातील विभागीय शिक्षण उपसंचालक कार्यालयातील (Pune Divisional Deputy Director of Education Office)शिक्षण उपनिरीक्षक रावसाहेब मिरगणे (Raosaheb Mirgane)यांना 1 लाख रुपयांची लाच घेताना रांगेहात पकडण्यात आले. त्यानंतर संबंधित महिला शिक्षिकेला एका दिवसात तिचा शालयार्थ आयडी मिळाला.मात्र, शालार्थ आयडी मिळवण्यासाठी शिक्षकांना लाच लुचपत प्रतिबंधक विभागाकडे तक्रार का करावी लागते? याचे चिंतन करण्याची वेळ शिक्षण विभागावर आली आहे. तसेच शासनाने शिक्षकांना शालार्थ आयडी देण्यासाठी स्पष्ट नियमावली दिलेली असताना अणूनही शिक्षकांना शिक्षण विभागाच्या कार्यालयात खेटा का माराव्या लागतात? असाही प्रश्न उपस्थित केला जात आहे.
सोलापूर जिल्ह्यातील माळशिरस तालुक्यामधील बोरगाव येथील श्रीनाथ विद्यालयात एक सहशिक्षिका २०१६ पासून काम करते. लाच लुचपत प्रतिबंधक विभागाकडे तिच्या पतीने शालार्थ आयडी मिळण्यासाठी पैसे मागितले जात असल्याची तक्रार केली होती. शालार्थ आयडी नसल्याने ती शिक्षिका विनावेतन काम करीत होती. शालार्थ आयडी मिळविण्यासाठी १६ जून २०२५ रोजी शिक्षण उपसंचालक यांच्याकडे प्रस्ताव पाठविला होता. त्यांच्यासोबत तालुक्यातील इतर ६ शिक्षकांनी त्यांचे शालार्थ आयडी मिळणे करीता प्रस्ताव सादर केला होता. त्यांना शालार्थ आयडी मिळाले तसेच त्यांचा पगारही सुरु झाला. मात्र, तक्रारदार यांच्या पत्नीस शालार्थ आयडी न मिळाल्याने पगार मिळत नाही.त्यामुळे ही तक्रार करण्यात आली होती. त्यानंतर पोलीस प्रशासनाने संबंधित महिलेला एका दिवसात शालार्थ आयडी मिळवून दिला.
शालार्थ आयडीसाठी 1 लाख रुपयांची लाच घेतलेल्या रावसाहेब मिरगणे या अधिकाऱ्यांच्या कार्यालयात आणखी १ लाख २० हजार रुपये आढळून आले होते. हे कोणत्याही शासकीय कामाव्यतिरिक्त होते. पोलिसांनी ही रक्कम सुध्दा जप्त केली होती. तसेच पोलिसांना हडपसर येथील त्यांच्या घरी ग्रीनव्हील सोसायटीमध्ये झाडाझडती केल्यानंतर घेतल्यानंतर ५६ हजार रुपयांची रोकड आढळून आली. त्यामुळे केवळ मिरगणे हेच शासकीय कामे करण्यासाठी लोकांकडून पैसे घेतात की या कार्यालयात पैशांची चटक लागलेले आणखी काही अधिकारी व कर्मचारी आहेत? याचीही चौकशी झाली पाहिजे.
----------------------------------
पवित्र पोरटाद्वारे नव्याने नियुक्त झालेल्या शिक्षकांच्या 'शालार्थ आयडी'चा प्रश्न निर्माण होणार नाही.परंतु, काही कारणांमुळे शालार्थ आयडी मिळण्याचे राहून गेलेल्या शिक्षकांसाठी शिबिर लावून शालार्थ आयडी देण्याची व्यवस्था करायला हवी.त्यांना कोणताही मनसिक, आर्थिक त्रास होणार नाही यांची काळजी यापुढील काळात शिक्षण विभागाने घ्यायला हवी.
- महेंद्र गणपुले, माजी उपाध्यक्ष, मुख्याध्यापक संघ
