गोंदिया नर्सिंग काॅलेजच्या ४० ते ४५ विद्यार्थिनींना विषबाधा, ४ जणी 'आयसीयू'मध्ये
महाविद्यालय प्रशासनाडून देण्यात आलेल्या माहितीनुसार, सध्या या मुलींना जिल्हा वैद्यकीय रुग्णालयात दाखल करण्यात आले आहे. सर्व विद्यार्थिनींची प्रकृती धोक्याबाहेर असून त्यांच्यावर उपचार सुरु आहे. चार विद्यार्थिनींना अतिदक्षता विभाग दाखल करण्यात आले असून त्यांची देखील प्रकृती धोक्याबाहेर असल्याची माहिती वैद्यकीय अधिष्ठाता डॉ. कुसुमाकर घोरपडे यांनी दिली आहे.
eduvarta@gmail.com 
एज्युवार्ता न्यूज नेटवर्क
गोंदिया येथील जिल्हा सामान्य रुग्णालयांतर्गत येणाऱ्या शासकीय नर्सिंग कॉलेजच्या (Govt Nursing College) ४० ते ४५ विद्यार्थिनींना विषबाधा (Students get food poisoning) झाल्याचा धक्कादायक प्रकार समोर आला आहे. रात्रीचे जेवन केल्याच्या काही तासानंतर या सर्व विद्यार्थिनींना पोटदुखी, उलटी, मळमळ (Stomach pain vomiting and nausea) आणि हगवण याचा त्रास जाणवू लागला. मात्र रात्रीची वेळ असल्याने हा प्रकार कोणाच्या निदर्शनास आला नाही. मात्र, आज सकाळी १० वाजता हा त्रास जवळपास ४० ते ४५ मुलींना जाणवू लागला, त्यानंतर ही घटना उघडकीस आली.
महाविद्यालय प्रशासनाडून देण्यात आलेल्या माहितीनुसार, सध्या या मुलींना जिल्हा वैद्यकीय रुग्णालयात दाखल करण्यात आले आहे. सर्व विद्यार्थिनींची प्रकृती धोक्याबाहेर असून त्यांच्यावर उपचार सुरु आहे. चार विद्यार्थिनींना अतिदक्षता विभाग दाखल करण्यात आले असून त्यांची देखील प्रकृती धोक्याबाहेर असल्याची माहिती वैद्यकीय अधिष्ठाता डॉ. कुसुमाकर घोरपडे यांनी दिली आहे.
मिळालेल्या माहितीनुसार, गोंदिया शासकीय नर्सिंग महाविद्यालयात एकूण १८५ विद्यार्थिनी निवासी राहून नर्सिंगचे प्रशिक्षण घेत आहेत. या सर्व विद्यार्थिनींना कॉलेजच्या कॅन्टीन मधून जेवण आणि नाश्ता दिला जातो. बुधवारी रात्री या सर्व विद्यार्थिनींनी कडी आणि पुलाव खाल्ला होता. यानंतर रात्री चार-पाच विद्यार्थिनींना पोटदुखीचा त्रास व उलट्या होऊ लागल्याने त्यांना त्वरित उपचारासाठी जिल्हा वैद्यकीय रुग्णालयात दाखल करण्यात आले.
मात्र, गुरुवारी सकाळी १० वाजताच्या सुमारास नर्सिंग कॉलेजच्या जवळपास ३५ ते ४० विद्यार्थिनींना देखील नेमका असाच त्रास होवू लागला. त्यामुळे या सर्व विद्यार्थिनींना तातडीने रुग्णालयात दाखल करुन उपचार सुरु करण्यात आले. विशेष म्हणजे बुधवारी रात्री जेवण केल्यानंतर चार-पाच विद्यार्थिनींना हा त्रास सुरु झाला. त्यानंतर गुरुवारी जवळपास ४० विद्यार्थिनींना पोटदुखी, उलट्या होवू लागल्याने नेमकी या विद्यार्थिनींना विषबाधा कशातून झाली हे स्पष्ट झाले नाही.
शासकीय नर्सिंग कॉलेजच्या ४० ते ४५ विद्यार्थिनींना एकाच वेळी पोटदुखी आणि उलटीचा त्रास होऊ लागल्याने या विद्यार्थिनींना विषबाधा झाल्याचे सांगितले जात आहे. मात्र, ही विषबाधा नेमकी जेवणातून झाली की पाण्यामुळे झाली याचा शोध घेण्यासाठी अन्न आणि पाण्याचे नमुने तपासणीसाठी अन्न व औषध विभागाच्या प्रयोग शाळेत तपासणीसाठी पाठविले आहेत.
