हाडे नाजूक, मात्र जिद्द पोलादी; 'ओस्टीओजेणेसिस इमपरफेक्टा' आजारावर मात करत वृशांतने मिळवले 83% गुण
आज वृशांत वाघायेची कथा अनेकांसाठी प्रेरणादायी ठरत आहे. शारीरिक मर्यादा असूनही मनात जर जिद्द असेल, तर कोणतीही अडचण आपल्याला थांबवू शकत नाही, हेच त्याने आपल्या यशातून दाखवून दिले आहे.
eduvarta@gmail.com 
एज्युवार्ता न्यूज नेटवर्क
जन्मापासूनच ओस्टीओजेणेसिस इमपरफेक्टा (Osteogenesis Imperfecta) या दुर्मिळ आजाराशी झुंज देत आयुष्य जगणाऱ्या एका विद्यार्थ्याने जिद्द, चिकाटी आणि आत्मविश्वासाच्या जोरावर अशक्याला शक्य करून दाखवले आहे. वर्धा जिल्ह्यातील तळेगाव येथील विद्यार्थी वृशांत वाघाये (Student Vrushant Waghaye) याने सीबीएसई 10 वीच्या परीक्षेत (CBSE Class 10 Exams) तब्बल 83 टक्के गुण (83 percent marks) मिळवत यशाचा नवा इतिहास घडवला आहे. आजारामुळे या विद्यार्थ्याचे हाडे जरी नाजूक असले तरी जिद्द मात्र पोलादी असल्याचे दिसून आले.
वृशांतसाठी ही परीक्षा केवळ शैक्षणिक नव्हती, तर आयुष्याशी चाललेली एक मोठी लढाई होती. शरीराची हाडे अतिशय नाजूक असल्यामुळे त्याला चालणे-फिरणे काय हालणेही कठीण आहे. तरीही हार न मानता त्याने शिक्षणाची वाट सोडली नाही. त्याने फक्त परीक्षाच दिली नाही तर, चांगल्या यशाला गवसणी घातली आहे.
परीक्षा देण्यासाठी वृशांतला खाटेच्या सहाय्याने एम्ब्युलन्समधून परीक्षा केंद्रावर नेण्यात आले. प्रत्येक पेपर हा त्याच्यासाठी एक युद्धच होता. त्याने प्रत्येक वेळी जिद्दीने सामना केला. “मला पुढे जाऊन अधिकारी व्हायचे आहे,” असे वृशांत ठामपणे सांगतो. त्याची ही इच्छा केवळ स्वप्न नाही, तर त्याच्या जिद्दीचा आणि आत्मविश्वासाचा पुरावा आहे.
आज वृशांत वाघायेची कथा अनेकांसाठी प्रेरणादायी ठरत आहे. शारीरिक मर्यादा असूनही मनात जर जिद्द असेल, तर कोणतीही अडचण आपल्याला थांबवू शकत नाही, हेच त्याने आपल्या यशातून दाखवून दिले आहे.
