नगरपरिषद भरतीत भ्रष्टाचार; स्पर्धा परीक्षा समन्वय समितीची SIT मार्फत चौकशीची मागणी 

एज्युवार्ता न्यूज नेटवर्क 

शिंदे-फडणवीस सरकारने (Shinde-Fadnavis government) घेतलेल्या  नगरपरिषद भरतीत (Municipal Council recruitment) भ्रष्टाचार झाल्याचा आरोप स्पर्धा परीक्षा समन्वय समितीने (Competitive Examination Coordination Committee) केला आहे. नगरपरिषद भरतीत भ्रष्ट मार्गाने नोकरी मिळवणाऱ्या उमेदवारांसह संबंधितांची न्यायालयीन SIT मार्फत चौकशी (Investigation by judicial SIT) करून कारवाई करण्याची मागणी देखील करण्यात आली आहे. त्यासंबंधित समितीकडून एक्स या सोशल मिडिया अकाउंटवर पोस्ट शेअर करण्यात आली आहे. 

नगरपरिषद पदभरतीत मिळालेल्या काही पुराव्यांच्या आधारावर स्पर्धा परीक्षा समन्वय समितीने नगरपरिषद संचालनालय, मुंबई येथे तक्रार दाखल केलेली होती. समितीने केलेल्या तक्रारी नंतर काही उमेदवारांवर कारवाई होणार आहे. नगरपरिषद संचालनालयाने निवड यादीतील सर्वच उमेदवारांचे लॉगीन तपासावे अशी मागणी करण्यात येणार असल्याचे सांगितले आहे. यामुळे नगरपरिषद भरतीत इतरही भ्रष्ट उमेदवारांवर कारवाई होण्याची शक्यता आहे.

आरोप असलेल्या उमेदवारांनी गुरू ऑनलाईन परीक्षा केंद्र, लातूर येथून परीक्षा दिली असल्याची प्राथमिक माहिती आहे. गुरू ऑनलाईन परीक्षा केंद्र जवळपास सर्वच परीक्षांमध्ये मॅनेज करण्यात आले असल्याचा देखील आरोप स्पर्धा परीक्षा समन्वय समितीकडून करण्यात आला आहे. उमेदवारांच्या लॉगीन मध्ये त्यांचे वर्तन संशयास्पद असल्याचे TCS व्दारे देण्यात आलेल्या प्राथमिक रिपोर्ट मध्ये समोर आले आहे, यासंबंधी आयोजित करण्यात आलेल्या सुनावणीसाठी TCS, आरोपी आणि समन्वय समितीला उपस्थित राहण्याचे निर्देश देण्यात आले, असल्याचे समितीने शेअर करण्यात आलेल्या पोस्टमध्ये म्हटले आहे.