रेल्वेमध्ये तब्बल 6 हजारांहून अधिक रिक्त जागांसाठी भरती
एकूण रिक्त पदांपैकी १८० पदे तंत्रज्ञ ग्रेड १ सिग्नलसाठी आहेत, तर उर्वरित ६ हजार पदे तंत्रज्ञ ग्रेड ३ च्या पदांसाठी आहेत.
eduvarta@gmail.com 
एज्युवार्ता न्यूज नेटवर्क
रेल्वे भरती मंडळाने (RRB) २०२५-२६ या वर्षासाठी भारतीय रेल्वेच्या विविध झोनमध्ये ६ हजार १८० तंत्रज्ञांच्या रिक्त पदांसाठी मोठ्या प्रमाणात भरती (Massive recruitment for technician vacancies) मोहीम अधिकृतपणे अधिसूचित केली आहे. १६ जून रोजीच्या एम्प्लॉयमेंट न्यूजमध्ये एक छोटीशी अधिसूचना प्रकाशित करण्यात आली आहे, ज्यामध्ये २७ जूनपर्यंत सविस्तर जाहिरात (CEN ०२/२०२५) येण्याची शक्यता आहे. या भरतीसाठी ऑनलाइन नोंदणी २८ जून रोजी सुरू होईल असून २८ जुलै रोजी रात्री ११.५९ वाजता संपेल.
एकूण रिक्त पदांपैकी १८० पदे तंत्रज्ञ ग्रेड १ सिग्नलसाठी आहेत, तर उर्वरित ६ हजार पदे तंत्रज्ञ ग्रेड ३ च्या पदांसाठी आहेत. दोन्ही पदांसाठी निवड संगणक-आधारित चाचणी (CBT) द्वारे केली जाणार आहे. त्यानंतर कागदपत्र पडताळणी आणि वैद्यकीय फिटनेस चाचणी घेतली जाईल.
भारतीय रेल्वेच्या तांत्रिक कर्मचाऱ्यांमध्ये सामील होऊ इच्छिणाऱ्या उमेदवारांसाठी, विशेषतः ज्यांना मागील भरतीवेळी संधी मिळाली नाही त्यांच्यासाठी या भरतीच्या माध्यमातून पुन्हा एकदा संधी प्राप्त झाली आहे.
पात्रता काय असेल?
तंत्रज्ञ ग्रेड १ सिग्नल : अर्जदारांकडे भौतिकशास्त्र, इलेक्ट्रॉनिक्स, संगणक विज्ञान, आयटी किंवा इन्स्ट्रुमेंटेशनमध्ये बीएससी पदवी किंवा संबंधित विषयांमध्ये अभियांत्रिकीमध्ये डिप्लोमा/पदवी असणे आवश्यक आहे.
तंत्रज्ञ ग्रेड ३: उमेदवारांनी १० वी उत्तीर्ण (एसएसएलसी/मॅट्रिक्युलेशन) आणि फाउंड्रीमन, मोल्डर, पॅटर्न मेकर, किंवा फोर्जर आणि हीट ट्रीटर सारख्या विशिष्ट ट्रेडमध्ये आयटीआय किंवा अप्रेंटिसशिप पूर्ण केलेली असावी.
ग्रेड १ सिग्नल या पदासाठी उमेदवारांचे वय १८ ते ३३ वर्षे असावे. तर ग्रेड ३ या पदासाठी उमेदवारांचे १८ ते ३० वर्षे असणे आवश्यक आहे. तसेच राखीव श्रेणींसाठी सरकारी नियमांनुसार वयात सूट लागू आहे.
यासाठी अनुसूचित जाती/जमाती, माजी सैनिक, दिव्यांग, महिला, ट्रान्सजेंडर, अल्पसंख्याक आणि आर्थिकदृष्ट्या मागास वर्ग यांच्यासाठी रुपये २५० शुल्क असेल. (सीबीटीमध्ये उपस्थित राहिल्यावर पूर्णपणे परत करण्यायोग्य) तर इतर सर्व श्रेणीसाठी ५०० रुपये शुल्क असणार आहे. (सीबीटीमध्ये उपस्थित राहिल्यावर ४०० रुपये परत करण्यायोग्य)
अशी असेल अर्ज प्रक्रिया
२८ जून रोजी पोर्टल लाईव्ह झाल्यानंतर उमेदवार https://www.rrbcdg.gov.in/ या अधिकृत आरआरबी वेबसाइटद्वारे ऑनलाइन अर्ज करू शकतील.
