कृषी पदव्युत्तर प्रवेशाच्या तिसऱ्या फेरीला पुन्हा स्थगिती; नवीन वेळापत्रक लवकरच जाहीर होणार
महाराष्ट्र कृषी शिक्षण व संशोधन परिषदेने कृषी पदव्युत्तर प्रवेश प्रक्रिया २०२६-२७ अंतर्गत तिसऱ्या प्रवेश फेरीला पुन्हा स्थगिती दिली आहे. महासंचालक राहुल महिवाल यांनी तातडीचे परिपत्रक काढून ५ ते १२ ऑक्टोबर दरम्यान चारही कृषी विद्यापीठांच्या मुख्यालयात होणारी तिसरी प्रवेशफेरी तात्पुरती स्थगित केली आहे.
Eduvarta
एज्युवार्ता न्यूज नेटवर्क
महाराष्ट्र कृषी शिक्षण व संशोधन परिषदेने कृषी पदव्युत्तर प्रवेश प्रक्रिया २०२६-२७ अंतर्गत तिसऱ्या प्रवेश फेरीला पुन्हा स्थगिती दिली आहे. महासंचालक राहुल महिवाल यांनी तातडीचे परिपत्रक काढून ५ ते १२ ऑक्टोबर दरम्यान चारही कृषी विद्यापीठांच्या मुख्यालयात होणारी तिसरी प्रवेशफेरी तात्पुरती स्थगित केली आहे. परिपत्रकात पुढील प्रवेश वेळापत्रक लवकरच जाहीर करण्यात येईल, असे स्पष्ट नमूद करण्यात आले आहे. या निर्णयामुळे हजारो इच्छुक विद्यार्थी आणि पालक नव्या वेळापत्रकाच्या प्रतिक्षेत आहेत.
यापूर्वी २२ सप्टेंबर रोजी पुणे येथील कृषी महाविद्यालयात तिसऱ्या प्रवेश फेरीचा दुसरा आणि अंतिम दिवस सुरू होता. त्यावेळी प्रवेश प्रक्रियेतील पारदर्शकतेबाबत विद्यार्थी आणि पालकांनी तीव्र आक्षेप नोंदवले. कृषी परिषदेच्या शिक्षण संचालकांसोबत विद्यार्थी-पालकांचा वाद झाला आणि रात्रीच सुरू असलेली प्रक्रिया तात्पुरती स्थगित करण्यात आली. या घटनेनंतर परिषदेने ३० सप्टेंबर रोजी नवीन परिपत्रक जारी करून पुण्याऐवजी संबंधित कृषी विद्यापीठांच्या मुख्यालयात ५ ते १२ ऑक्टोबर दरम्यान तिसरी फेरी घेण्याचे जाहीर केले होते.
मात्र आता पुन्हा एकदा स्थगिती दिल्याने प्रवेश प्रक्रियेतील अनिश्चितता वाढली आहे. विद्यार्थी आणि पालक पारदर्शकता आणि सुव्यवस्थित प्रक्रियेची मागणी करत आहेत. कृषी परिषदेने यापूर्वीही प्रक्रिया स्थगित केली होती, त्यामुळे विद्यार्थ्यांमध्ये संभ्रम निर्माण झाला आहे. चारही कृषी विद्यापीठांच्या मुख्यालयात होणारी फेरी आता नवीन वेळापत्रकानुसार होईल, अशी अपेक्षा आहे.
कृषी परिषदेने विद्यार्थ्यांच्या हितासाठी योग्य निर्णय घेऊन लवकरात लवकर नवीन वेळापत्रक जाहीर करावे, अशी मागणी विद्यार्थी संघटनांकडून होत आहे. पदव्युत्तर प्रवेश प्रक्रियेत पारदर्शकता राखणे आणि सर्व विद्यार्थ्यांना समान संधी मिळणे आवश्यक आहे. परिषदेने याबाबत तात्काळ पावले उचलून प्रवेश प्रक्रिया सुलभ आणि स्पष्ट केल्यास विद्यार्थी-पालकांना दिलासा मिळेल. नव्या वेळापत्रकाची वाट पाहत असलेल्या इच्छुकांना परिषदेकडून लवकरच अधिकृत माहिती मिळण्याची आशा आहे.
