टी. जे. महाविद्यालयाच्या रोजगार मेळाव्यात १०८ विद्यार्थ्यांना नोकरी

रोजगार महाकुंभ महाराष्ट्र शासन अंतर्गत पुण्यातील खडकी येथील टिकाराम जगन्नाथ महाविद्यालयात आयोजित करण्यात आलेल्या भव्य रोजगार मेळाव्यात तब्बल १०८ विद्यार्थ्यांना नियुक्तीपत्रे (Appointment Orders) देण्यात आली. या मेळाव्यात विविध क्षेत्रांतील ३७ नामांकित कंपन्यांनी सहभाग घेतला, तर ४०७ विद्यार्थ्यांनी रोजगाराच्या संधींचा लाभ घेतला.

रोजगार मेळाव्याच्या उद्घाटनप्रसंगी संस्थेचे संचालक ॲड. अजय सूर्यवंशी म्हणाले, “महाविद्यालयात पदवी ते पदव्युत्तर स्तरापर्यंत विविध अभ्यासक्रम उपलब्ध आहेत. विद्यार्थ्यांनी शिक्षणाच्या माध्यमातून स्वतःच्या पायावर उभे राहून नोकरी किंवा व्यवसायाच्या माध्यमातून आपले भवितव्य घडवावे, यासाठी महाविद्यालय सातत्याने प्रयत्नशील आहे.”

या अभिनव उपक्रमाला संस्थेचे अध्यक्ष कृष्णकुमार गोयल यांनी शुभेच्छा दिल्या. विद्यार्थ्यांच्या सर्वांगीण विकासासाठी आणि समाजोपयोगी उपक्रमांसाठी महाविद्यालयाने असे उपक्रम सातत्याने राबवावेत, असे मत त्यांनी व्यक्त केले.

संस्थेचे सचिव आनंद छाजेड म्हणाले, अलीकडच्या काळात महाविद्यालयाने विविध क्षेत्रांत उल्लेखनीय प्रगती केली आहे. प्रत्येक विद्यार्थ्याला रोजगाराची संधी उपलब्ध करून देणे हा संस्थेचा प्रमुख उद्देश असून त्यासाठी रोजगार मेळावे व उद्योगांशी समन्वयाचे उपक्रम राबविण्यात येत आहेत.

या रोजगार मेळाव्यात टाटा मोटर्स, बजाज, मिड्रा ग्रुप, एस. के. युनिटिक, महिंद्रा, किर्लोस्कर, ॲक्सिस बँक, मुथूट फायनान्स, बालाजी ग्लोबल प्रायव्हेट लिमिटेड, कॉल फ्लेक्स, लाईट हाऊस यांच्यासह एकूण ३७ नामांकित कंपन्यांनी सहभाग नोंदवला. विविध कंपन्यांच्या प्रतिनिधींनी विद्यार्थ्यांच्या मुलाखती घेतल्या. त्यातून १०८ विद्यार्थ्यांची निवड करून त्यांना नियुक्तीपत्रे प्रदान करण्यात आली.

मेळाव्याच्या आयोजनादरम्यान महाविद्यालयाचे प्राचार्य डॉ. संजय चाकणे यांनी महाविद्यालयाच्या आगामी शैक्षणिक व विद्यार्थी-केंद्रित उपक्रमांची माहिती दिली. रोजगार मेळाव्याचे समन्वयक व उपप्राचार्य प्रा. राजेंद्र लेले यांनी सहभागी झालेल्या सर्व कंपन्यांच्या प्रतिनिधींचे आभार मानले.