शिक्षण विभागाचा मोठा निर्णय! ९वी ते १२वीच्या अभ्यासक्रमाची जबाबदारी राज्य मंडळाकडे
महाराष्ट्र शासनाने माध्यमिक आणि उच्च माध्यमिक शिक्षणात महत्त्वपूर्ण बदल जाहीर केला आहे. इयत्ता नववी ते बारावीचा अभ्यासक्रम तयार करण्याची आणि पाठ्यपुस्तके तयार करण्याची जबाबदारी आता महाराष्ट्र राज्य माध्यमिक व उच्च माध्यमिक शिक्षण मंडळाकडे सोपवण्यात आली आहे.
Eduvarta
एज्युवार्ता न्यूज नेटवर्क
महाराष्ट्र शासनाने माध्यमिक आणि उच्च माध्यमिक शिक्षणात महत्त्वपूर्ण बदल जाहीर केला आहे. इयत्ता नववी ते बारावीचा अभ्यासक्रम तयार करण्याची आणि पाठ्यपुस्तके तयार करण्याची जबाबदारी आता महाराष्ट्र राज्य माध्यमिक व उच्च माध्यमिक शिक्षण मंडळाकडे सोपवण्यात आली आहे. गेल्या काही वर्षांत हे काम महाराष्ट्र राज्य शैक्षणिक संशोधन व प्रशिक्षण परिषदेमार्फत (एससीईआरटी) केले जात होते. मात्र, आता पुन्हा ही जबाबदारी राज्य मंडळाकडे दिल्याने शिक्षण क्षेत्रात नवीन दिशा मिळणार आहे. राज्य मंडळाच्या कार्यकारी मंडळाच्या अलीकडील बैठकीत या निर्णयाला औपचारिक मान्यता देण्यात आली.
महाराष्ट्र शिक्षण मंडळ अधिनियम, १९६५ नुसार राज्य मंडळाला माध्यमिक शिक्षणासाठी पाठ्यक्रम आणि अभ्यासक्रम ठरवण्याचे अधिकार आहेत. या कायद्याच्या आधारेच हा निर्णय घेण्यात आला आहे. राष्ट्रीय शिक्षण धोरण २०२० च्या अंमलबजावणीनुसार शैक्षणिक वर्ष २०२७-२८ पासून इयत्ता पाचवी, सातवी, नववी आणि अकरावीसाठी नवा अभ्यासक्रम आणि नवीन पाठ्यपुस्तके लागू होणार आहेत. त्यापैकी नववी आणि अकरावीचा अभ्यासक्रम व पाठ्यपुस्तके राज्य मंडळ तयार करेल, तर छपाईचे काम बालभारतीकडे राहील.
यापूर्वी इयत्ता दहावी ते बारावीचा अभ्यासक्रम राज्य मंडळाकडूनच तयार केला जात होता. मात्र, २०१६ मध्ये राज्य सरकारने अभ्यासक्रम निर्मितीची जबाबदारी एससीईआरटीकडे आणि पाठ्यपुस्तकांचे काम बालभारतीकडे हस्तांतरित केले होते. आता कायद्याच्या तरतुदीनुसार नववी ते बारावीसाठी पुन्हा राज्य मंडळाला पूर्ण अधिकार मिळाले आहेत. त्यामुळे अभ्यासक्रमात अधिक सुसंगतता आणि गुणवत्तेची अपेक्षा व्यक्त केली जात आहे.
शैक्षणिक वर्ष २०२७-२८ मध्ये इयत्ता नववी आणि अकरावीसाठी, तर २०२८-२९ मध्ये दहावी आणि बारावीसाठी नवा अभ्यासक्रम व पाठ्यपुस्तके राज्य मंडळाकडून तयार होतील. या बदलामुळे विद्यार्थ्यांना अधिक अद्ययावत आणि व्यावहारिक ज्ञान मिळेल, अशी आशा शिक्षण तज्ज्ञ व्यक्त करत आहेत. राज्य मंडळ आता या जबाबदारीसाठी सज्ज होत असून, गुणवत्तापूर्ण शिक्षणाच्या दिशेने हा एक महत्त्वाचा टप्पा ठरेल.
